立會補選九西新東大混戰 民主派名單終有眉目

　　立法會今日就刊憲咗下年3月11日會進行立法會補選，而提名期就係1月16日至29日。Jenny上次都講，建制派早就協調好各區嘅出戰人選，反觀民主派就一直未有一張明顯嘅名單出爐，呢幾日終於有啲眉目喇！

 

 

根據泛民協商，DQ4有優先權參選自己本來嘅議席，羅冠聰因為被判監所以要交由周庭出選;姚松炎就一直被指有意染指九西直選。(姚松炎fb圖片)

 

姚松炎傾向留喺建測規園界

 

　　今次補選嘅4個位，包括咗「九龍西」、「新界東」、「港島」同埋「建築、測量、都市規劃及園境界」功能界別各一席。聽講港島就好啲，之前已經敲定由被DQ嘅羅冠聰同黨黨友、「學民女神」周庭出選，亦都冇乜民主派對手，連初選都慳返。

 

　　至於建築、測量、都市規劃及園境界呢個功能界別，一直盛傳姚松炎都諗住轉戰直選！不過據Jenny所知，而家佢仲未有最後決定，不過就傾向繼續留返建測規園界。佢仲響一個專訪入面講話除非有「凌駕性需要」，如果唔係都冇諗住轉去直選。之不過，功能組別一直都唔係民主派地頭，Jenny覺得佢拎返呢個位難度都唔低。

 

九西名單冇亮點 阿基阿超未夠照

 

　　不過九西同新東就冇咁明朗喇！Jenny聽講，九西嗰邊因為區諾軒因家庭理由唔選，所以都有唔少自決派就游說姚代區諾軒去馬選，加上而家份初選名單上面嘅人選冇咩亮點，姚松炎作為DQ4其中之一，諗住靠佢吸返啲票！

 

　　點都好始終有初選呢關要過，聽聞姚同其他民主派仲協調緊，而其他打算參與初選嘅民主派就仲有民主黨嘅區議員袁海文、民協馮檢基同埋「七警案」事主曾健超。但係Jenny就擔心，雖然姚松炎有較高認知度，如果真係轉去玩直選，又未必真係夠一早已經紥行馬嘅建制Fight。 

 

新東民主黨料撐細孖 唔食咖哩飯

 

　　而新東方面，除咗一直話想選嘅新民主同盟范國威(咖哩飯)，同埋有本土派支持嘅前中大學生會會長張秀賢之外;工黨新主席郭永健(細孖)今日就發咗採訪通知，確定話會參與新界東補選嘅初選;民主黨胡志偉今日都話佢哋黨嘅區鎮樺已經正式來信話退出初選，所以新東都仲係三人混戰。

 

　　Jenny收到風，范國威就已經交咗初選報名表同埋費用，而郭永健同張秀賢就分別喺今日同星期日交錢交表。不過，擁有大堆地區樁腳嘅民主黨一向同范國威有「牙齒印」，又同本土派關係麻麻，所以Jenny估即使郭永健名氣唔高，大黨應該會撐細孖多過咖哩飯㗎啦！

 

葉劉親口認將派人出選港島

 

　　至於建制派份名單，Jenny都估應該冇乜點改，就同大家重溫一下：功能組別有上次連任失敗嘅謝偉銓、九龍西有青年才俊鄭泳舜、新界東有民記工記力谷嘅鄧家彪（阿Bill）、港島就係葉劉愛將陳家珮（Judy）。今日葉劉都同Jenny確認咗新民黨的確係打算派人參選，相信呢幾個月都會喺港島唔同嘅角落見到Judy密密出鏡喇！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票