免費搭車船日 你今日搭咗未？

　　香港總商會今日舉辦咗個「免費乘搭車船日」，大家今日全日可以無限次免費乘搭電車，同埋兩條來往尖沙咀至中環及灣仔嘅天星小輪航線。趁住仲有幾個鐘，大家快啲去遊吓「叮叮河」，或者瘋狂過海啦！

　　既然有免費嘢，咁又點少得Jenny份呢！Jenny今日都特登一早去搭電車，到西環嘅電車廠出面睇吓個活動啟動儀式。不過原來活動未啟動就已經可以免費乘搭，Jenny同唔少市民都唔知道，落車時仲傻更更咁拎個銀包出嚟添！

一人一鈴鐺扮「叮叮」

　　Jenny去到現場，就見到搞呢個活動嘅香港總商會今次就裝飾咗兩架電車，一眾公司代表一人一鈴鐺，扮電車嘅「叮叮聲」，象徵住呢個活動正式啟動喎！

　　香港總商會主席吳天海就話，今年已經係第7年搞呢個活動，年年都有幾十萬人參加㗎！咁今年又投放咗幾多錢入去呢？吳生就話其實有數得計嘅，電車、天星小輪嘅交通費都係2至3蚊，一個市民3蚊，一百萬個市民咪300萬囉！所以今年都希望市民多多支持喇！

　　至於點解係同電車同埋天星小輪合作呢？吳生就解釋，電車同天星小輪同香港總商會一樣，都已經有超過一百年嘅歷史，所以就揀咗呢兩種交通工具做合作夥伴，不過就暫時未有打算擴展至其他交通工具。睇嚟住得遠少少、又唔使過海返工嘅新界市民就未必享受到呢個免費搭車船日喇！Jenny都希望有日可以擴展到其他交通工具，而且仲可以係假日舉行，咁就可以去多啲唔同嘅地方，感受吓唔同嘅香港喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票