立法會上星期過咗9年嚟第一次嘅《施政報告》致謝議案，今日就輪到恢復返審議政府提出嘅「一地兩檢」無約束力議案，毫無懸念之下，當然係通過咗啦！今日就輪到公民黨嘅郭家麒(郭醫生)發言嗰陣，佢充分善用其泌尿科專科嘅專業知識，即使「拉布」都不忘關心各位議會同事嘅身體健康，點知講講吓竟然自爆咗句「我比較短…」究竟發生咩事？等Jenny話你知啦！

KennethFB仲tag埋郭醫生

琼子動議縮表決鐘聲　結果得不償失

　　話說「一地兩檢」無約束力議案雖然議員發言環節完咗，但仲有8個議員提出咗修正案，要表決晒先可以真正入戲肉嘅！所以民建聯主席李慧琼(Starry)就動議將表決鐘聲由5分鐘縮短至1分鐘，咁就可以慳返30幾分鐘嘅鐘聲時間！之但係Starry係唔係唔記得咗，每個議員都可以就呢個動議發言15分鐘噃！齋有3個議員發言都已經45分鐘喇！仲多過可以慳返嘅時間！Jenny就覺得似乎得不償失噃，唔通Starry其實都覺得呢個議案仲未討論夠？

　　果然不出Jenny所料，頭兩個發言嘅非建制派議員毛孟靜(Miss Mo)同郭家麒(郭醫生)都差唔多講咗30分鐘，毛姨姨就因為主席成日cut佢講嘢、話佢係咁離題，都講唔夠15分鐘添！至於公民黨嘅郭醫生不愧為泌尿科專科醫生，喺發言入面用返自己嘅專業，關心同事健康之餘仲畀返啲忠告各位同事。

千祈唔好亂用「我比較短…」開始句子

　　佢話根據統計，一般女性去廁所都要40秒，男性就要更長時間，而呢度去廁所仲距離咗4道門添！咁所以將表決鐘聲由5分鐘變1分鐘真係唔夠大家去廁所嘅。佢仲話有啲議員運動少，跑步比較差，如果出咗少少意外咁點算呢！睇嚟郭醫生都幾關心同事們嘅身體健康噃！講到呢到，唔知係唔係擔心主席好似cut毛姨姨嘅發言咁，郭醫生仲自爆咗句「我比較短…」Jenny同一眾行家都「吓」咗聲，好彩仲有後半句「…個發言」，原來佢係想講:「我比較短嘅⋯個發言」，引起全場爆笑。郭醫生啊！講啲唔講啲，好易嚇死人㗎！

　　之後發言嘅會計界議員梁繼昌都同郭醫生齊齊關心大家健康，話有研究指連20至30歲嘅男士平均去廁所都要21秒，議員同事都唔只呢個年齡層，話將鐘聲縮短明顯係違反人權啦！Jenny諗一諗、數一數，又係噃！而家立法會30歲以下嘅議員都一早DQ晒啦，Kenneth咁講又無錯喎！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】財政預算案展開公眾諮詢，學者倡問責官員減薪並削減公務員編制，你是否認同？ ► 立即投票