今年特首林鄭月娥《施政報告》入面睇到唔少創科嘅政策，尤其係想培育年輕創科人才。近來Fintech都算係討論嘅熱話，咁啱數碼港就有個「數碼港.大學合作夥伴計劃」(CUPP)今日就輪到班學生去Pitch一班評判加未來投資者。創科局副局長鍾偉強，就話自己雖然係官，但其實都一樣學緊點樣去Pitch唔同嘅人！今次可以講真係「同行」喇！

 

 

城大嘅「Fund2Play」，成員包括：（左起）鄭志雄、陳泱澄、孫卓榮。

 

有得去史丹福大學上堂恨死人喇！

 

　　話說呢個計劃係想等班大學生試吓用科技創業，唔係齋Talk係堅畀Support！一行成59個同學仔今年仲有得去美國矽谷參加創業營，除咗去史丹福大學上堂外，話明今年FinTech做主題，梗喺唔少得去參觀Citi Innovation Labs、Nasdaq Entrepreneurial Center、ReadWrite Labs Networking Lunch、Wells Fargo Startup (Fintech) Accelerator。齋聽都羨慕死Jenny喇！點解小妹當年讀書冇呢啲計劃？（又可能有，但唔知。）

 

Pitch唔使驚 偉強喺大廳！

 

　　今日就係班學生嘅DemoDay，即係去Pitch一班評判加未來投資者，獲得青睞嗰10隊就會有10萬蚊種子基金同創業培訓機會。Jenny就覺得喺香港咩都貴，要創業10萬蚊真係唔夠使，與其10隊每隊10萬，不如揀5隊每隊20萬啦！好似開心啲噃！

 

　　今日都有出席嘅創科局副局長鍾偉強，話自己做咗副局長之後，因為《施政報告》提出咗唔少創科政策，都要周圍去同私人機構Sell橋，就好似啲學生咁樣，所以佢同學生一樣都係學緊點樣去Pitch。唔使驚，偉強喺大廳！

 

科大嘅「LEVERUS」，成員包括：（左起）周鉉淦、雷良祐、黃（羽弋）然。

 

區塊鏈融資平台　連投行都有興趣

 

　　Jenny同其中兩隊參賽者傾過，分別係來自科大嘅「LEVERUS」同埋來自城大嘅「Fund2Play」。佢哋都好有諗頭㗎！好似「LEVERUS」咁，佢地就係利用區塊鏈技術去做一個畀對沖基金融資嘅平台; 「Fund2Play」就會透過人工智能同聊天機器去幫保險公司賣旅遊保。其中「LEVERUS」已有銀行嘅投行部門對佢哋個平台表示有興趣！不得了！

 

 

　　同學仔仲大讚史丹福大學有一個好好創業環境添！咪住！即係香港嘅大學畀唔到呢個環境你哋?同學仔都好識做咁話，香港讀書係長時間，同去史丹福上密集式上堂係兩回事，唔可以就咁比較嘅！Jenny覺得呢班同學仔轉數都幾快，將來一定都有一番作為嘅！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》說說心理急救：遇危急事故應如何面對？點樣正確提供情緒支援？講錯說話容易造成二次傷害！► 即睇