2017-10-30
田少不識綠置居?卿姐:生活喺唔同世界!
今屆立法會有唔少政黨都有新舊交替,新丁入咗議會之後就「忙到飛起」,咁之前「忙都飛起」嘅政黨「老鬼」,退咗落嚟又有咩做呢?民主黨前主席卿姐劉慧卿就繼續喺網台有個地頭做節目主持,得閒搵啲新知舊雨嚟做訪問,以前議會嘅同事、官員當然唔少得啦!特首林鄭月娥都上過去幾次。今日卿姐就請咗自由黨榮譽主席、都係前立法會議員田北俊田少上佢個節目,傾吓當前政治局勢咁喎!
田少畀人「搣柴」唔嬲豬
卿姐一開場就「發功」,大大聲咁同田少講:「十九大開完,我梗係要聽吓你(講),雖然你畀人搣咗柴!」,好彩田少都係玩得之人,冇嬲嬲豬,仲自嘲埋一份,話自己雖然畀人「搣咗柴」,但係喺政協圈子入邊仲有好多朋友嘅!
綠……綠置「屋」?
卿姐雖然退咗落嚟,但正所謂:「一日政界人一世政界人」,所以仲好留意近排發生嘅時事,好似一地兩檢啦、基本法研討會啦、連上周末新鮮滾熱辣嘅公屋變「綠置居」議題都噏到幾句。不過田少似乎就歸園田居,真係過緊退休生活咁噃,佢同卿姐分享早前去歐遊,話自己因為係中國人,多咗好多人尊敬,至於點解?佢就冇多講喇!。不過講到近排嘅新聞,佢就連「綠置居」個名都講錯做「綠置屋」,卿姐提完都係唔記得,睇嚟田少你返到香港要睇返多啲中文報紙喇!
卿姐反眼暗串田少
講講吓田少就轉話題,大讚特首林鄭嘅第一份《施政報告》「好嘢」,識得縮短到40分鐘嚟講。卿姐就搭咀,話自己都唔反對縮短嚟講,但係好「得意」地點解係聽行政會議嘅意見,而唔係問議員嘅意見呢?田少先如夢初醒,仲問多次「唔係佢自己話(要)講短啲?」睇嚟田少真係「退咗就休」,搞到卿姐好似有啲頂唔順,最後都忍唔住講咗句:「原來我哋生活喺唔同世界!」
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情