2019-10-03
【公司派錢】高層一招提升「奴動力」:向員工發放「每月社會動盪補貼」
早前公司經內近郵件向所有員工send出一封又驚又喜嘅email,就係公司派錢喇!!大家緊係即時引發一連串騷動啦。不過,點解大家只係開心左幾分鐘,就演變成狂噴18字真言呢?
話說呢幾個月香港人真係好辛苦,無論係「小朋友」、定係打工仔,人人都為左自己嘅目標而努力。偏偏,有人走嘅道路或者會同另一批人嘅道路背道而馳,導致影響到另一班人去達成佢地嘅目標。你可以話,「小朋友」要完夢,就要癱瘓經濟,迫當權者對話;而打工仔嘅目標當然就係要排除萬難,準時返到工喇,唔係邊有「山竹」呢件咁出名嘅事件呢?
就係因為社會問題,公司呢封令我地又驚又喜嘅email先會出現。E-mail內容大致係「社會動盪,公司明白大家通勤可能有困難,有需要嘅同事可以同上司要求home office,而公司亦宣佈向所有員工連續三個月派發allowance,每月$100,補助員工通勤嘅支出。」
大家喜嘅,當然因為公司派錢喇~但擘大對眼再望真啲!$100咋,仲要只係派三個月,加埋都只係$300蚊!大佬啊,住得遠啲真係要草三個月先夠錢搭一程的士!完全感受唔到果$100幫到啲咩!再諗深一層,大家就呢封email就估計左以下意思出黎:
「社會動盪,就算封路、封黨鐵,你地一樣都要返工!夠膽就同上司講唔返工想home office,記唔記名我唔知架~仲有,而家我地賞賜左錢比你地班奴隸,咁而家你地多左錢,就唔應該遲到啦?麻煩你地好好理用呢啲資金去用自動嘅方法準時9點鐘返到公司!home唔home office果啲,就閣下自理啦。」
唔知係我地諗多左,定公司真係有咁嘅意思。但多左果區區一百蚊後,大家真係準時左。平時唔準時,唔係因為大家訓晏左,而係最近道路交通情況都有阻塞;而家準時左,唔係因為大家唔再懶床、準時起身,而係大家都比呢隻白色恐怖嚇親,寧願再早啲起身都要準時返工。高層果然係高層,洗少少錢就可以確保更多嘅「奴動力」,以得到更高回報。香港地有呢班同高官一樣咁泯滅人性嘅人做管理層,真係多謝佢地成日施計保持公司及香港嘅生產力。
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情