【散播病菌】返工戴口罩係上位的好方法？致「周圍噴射液體同事」的一封信

　　親愛的百病纏身的同事：

 

　　同事啊，你好嗎？近來工作繁重、壓力大嗎？上位固然重要，但身體的健康也不容忽視啊。昨天在辦公室看到你面色慘白，雙唇發紫，連喉嚨都咳到聲音變得沙啞。雖然看到到處製造地雷給我們踩的你受苦了，大家心情都覺得涼快，但同時我們亦十分擔憂，擔憂你的身子、擔憂我們的健康、擔憂我們的家人。所以，在你未死之前，可否應承我們一件事….

 

　　就係唔該可唔可以戴返個死人口罩！？

 

 

　　我明白病咗仲要戴住個口罩焗住好辛苦，但都要戴㗎！我知鼻塞要用多一倍力去呼吸好辛苦；亦明白再戴埋口罩焗住，透唔到新鮮空氣就更加辛苦，我明㗎，我真係明，但我唔想病啊！見到你「飛哩啡呢」咁呻啲鼻涕出嚟，再用紙巾包住，你估我地唔嫌污糟咩？但大家會體諒你，因為我地知道你冇其他選擇，所以我地唔會迫你吞返落去。但咳就唔同！又要咳，又要唔戴口罩，你喉嚨深處果啖充斥住細菌嘅黃綠濃淡唔覺意咁飛噴左幾滴出嚟，細菌依附係四周物件，大家又唔知頭唔知路咁掂到細菌，甚至放入口…唔好話會傳播病菌啊，淨係衛生方面累到人地掂到你啲分泌物，你都應該覺得羞愧啦吓嘛？

 

　　如果你覺得戴口罩好唔舒服，影響到你嘅工作效率及上位速度，你大可放心，因為戴口罩為你帶嚟嘅好處比你想像更多！例如可以為你輕鬆帶嚟勤奮形象。戴口罩即係身體抱恙，病左都堅持返工，呢位同事真係一個勤力、有交帶及有責任感嘅員工。印象呢啲野，你平時就算一個打十個都未必Draw到人attention、留唔到好印象；但小小一個口罩，反而可能可以幫你帶嚟正面印象。

 

 

　　而且，神秘感覺仲可以提升你嘅桃花運添。口罩同cap帽一樣，比人一種神秘感。唔知大家有冇發現，有啲平時個樣平平凡凡嘅人，戴左口罩之後好似特別吸引，你仲可能因為好奇心，特別留意多啲呢個人。好運起上嚟，分分鐘下一個女朋友就係因為口罩而得米。

 

　　講咁多，都係想提醒各位病左嘅同事：有病要返工真係唔該戴返個口罩。公司嘅中央冷氣已經令空氣唔流通，如果你仲係呢個密室散播病菌，大家只會一個傳一個輪流病，甚至將病毒帶返屋企比屋企人。香港打工仔返工已經生不如死，要病住受折磨就更加痛苦，所以希望大家真係唔好為左一己舒服就瘋狂散播病菌。

 

　祝

　　各位安康

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇