【新年意頭菜】洋蔥栗子燜鴨

 

　　還有十日便是農曆新年！其實每年要諗新年菜色都有些難度，因為在這專欄寫過年應節食譜已經第七年了，要教的菜色早已教了。只要大家上網搜尋一下，就容易找到。

 

　　其實，所謂過年菜都是意頭菜，只要大家認為菜色容易煮，又出得大廳，就是一道好菜。

 

　　栗子燜雞大家都吃得多，或者聽到都覺得了無新意，那麼今次就改做栗子燜鴨吧！正值冬天，最好多吃滋陰補腎的菜色。栗子有補腎功效，而鴨又有滋陰功效，兩者食療功效極佳，大家不妨試下！

 

洋蔥栗子燜鴨

烹煮時間：30分鐘

份量：2人

 

 

材料：

　　冰鮮鴨  半隻（約1000克）

　　栗子    10粒 

　　薑片    3片

　　洋蔥    1/2 個（切件）

 

鴨醃料：

　　生抽　　2湯匙

　　老抽    1茶匙

　　砂糖    1/4茶匙

　　紹興酒  1茶匙

　　粟粉    1茶匙

　　麻油    1茶匙

 

調味料：

　　蠔油    1湯匙

　　老抽    1茶匙

　　胡椒粉  少許

　　熱水    150 毫升

 

粟粉水：

　　粟粉  　1/2 茶匙    

　　清水 　 1 湯匙

 

做法：

 

　　1. 將鴨沖洗，瀝乾水份斬件，加入醃料醃30分鐘。

 

 

　　2. 栗子去殼，放入滾水煲5分鐘，拿出栗子放在乾毛巾上將表面衣擦去。

 

 

　　3. 燒熱鑊落油2湯匙，將鴨件加入煎至兩面金黃色，盛起。

 

 

　　4. 燒熱鑊落油1湯匙，將薑片及洋蔥加入爆香，然後加入栗子炒一會。

 

 

　　5. 將鴨件加入爆炒一會，然後加入調味料及熱水，加鑊蓋慢火燜煮20分鐘。

 

　　6. 加入適量粟粉水，將汁液略為煮至濃稠，即可上碟。

 

 

小貼士：

　　煮鴨期間要留意水份的蒸發，可以適量地加入熱水去自行調較。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇