潮州粉果

 

 

　　韋太偶然都會到超市買一些急凍的點心回家做早餐，以往的點心大多數有蝦餃、乾蒸燒賣、珍珠雞、牛肉及蒸腸粉等等。近來給我發現有潮州粉果 (其實可能已經售賣多時)，所以買來品嚐一下，覺得口感都唔差，皮的韌性都較強，可惜太細粒，而且一包價錢都唔平。

 

　　見家中有一大包澄面，其實係之前做冰皮月餅時餘下的，為了不想浪費食材，而且自己又喜愛吃粉果，不如就自己包一大籠，除咗做早餐，還可以做埋午餐或茶點都可以。

 

　　大家都可以預先將粉果蒸好，放入冰格冷藏，食時再蒸熱吃便可，自己製作點心，保證餡料足，而且又唔會有太重味精呢 !

 

製作時間: 1小時

 

份量: 16個

 

 

皮材料: 

 

　　1) 澄麵 75克 + 生粉50克 (即木薯粉) + 鹽 1/4茶匙

 

　　2) 清水 200毫升

 

　　3) 菜油 1茶匙 (後下)

 

　　4) 生粉 15克(後下及作手粉)

 

餡料: 

 

　　沙葛180克、甜菜甫 2條 (約 40克)、乾蔥頭 2粒、蝦米 1 湯匙、豬肉碎 100克、炸花生 30克 (後下)   

 

調味料: 

 

　　雞粉、鹽、砂糖 各1/4 茶匙、胡椒粉及麻油 各少許

 

做法:

 

 

　　1.沙葛去皮，清洗切幼粒。甜菜甫用清水浸15分鐘，切幼粒。

 

　　2. 乾蔥頭刴成茸，蝦米浸軟切幼粒，備用。

 

　　3. 燒熱鑊，落少許油，將乾蔥茸爆香，加入蝦米、豬肉爆炒片刻，加入餘下材料及調味料炒勻，盛起放涼，加入炸花生拌勻成餡料。

 

 

 

　　4. 澄麵與生粉混合拌勻，將清水煲至大滾，然後快手沖入粉內，用匙巾快手攪勻，蓋上濕布焗5分鐘。

 

　　5. 枱上晒上少許生粉，然後將粉糰倒在枱上，趁熱加入菜油及適量生粉，用膠刮刀將麵糰搓開，再用雙手搓揉成光滑粉糰，將粉糰搓成長條狀及平均分成16份粉糰。

 

　　6. 用木棍將粉糰開成圓皮，包入適量餡料，將粉皮對摺及摺成雞冠型狀，收口黏緊。

 

　　7. 蒸籠放上牛油紙或蒸碟掃上油，將粉果放上，粉果表面再掃上油，用大火蒸約8-10分鐘至熟即成。

 

韋太小貼士: 

 

　　蒸好的粉果容易與其他粉果黐在一起，蒸前粉果表面掃油可以防止黏合。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情