續上期《【職場毒瘤】10大極品老細（上）》，小生繼續力數辦公室「un頂able」老細，預祝各位打工仔迎難而上、遇強愈強。

 

極品6：獨裁專制型

　　認為自己講嘅嘢永遠是對的，只要你膽敢「逆旨」持相反意見，就係挑戰權威，絕對唔會有好日子過。

 

　　應對招式：千祈唔好天真豬上身指正佢，搞到自己無運行。總之佢話做咪做囉，佢要死唔通唔畀佢死咩？

 

極品7：公私不分型

　　要求下屬幫手處理私人事務，如接仔女放學、攞乾洗衫褲、帶寵物扮靚等，令一班「非同鄉」員工無啦啦變咗家庭傭工。

 

　　應對招式：打份工啫，絕對無必要湊埋老細的私人嘢（除非閣下當真家庭傭工）。建議用「手頭好多嘢趕」、「放工後要返學」、「屋企有事」等理由婉拒，拒絕多幾次對方自然曉知難而退。

 

極品8：涼薄刻毒型

　　從來唔當員工係人，所有下屬喺佢眼中只係奴隸。例如：

　　-凌晨打電話交代公事（佢自己失眠但無諗過人地要瞓）

　　-老奉認為請病假者應該轉場玩Home office繼續Do（如果係得我仲使請SL？）

　　-要求員工瘋狂OT連踩30日無任何補水補假（噫咦，仲超然過勞工法例？）

 

　　應對招式：咁嘅老細，莫講話領導人，連基本尊重都唔識，跟著佢有損身心健康，早走早著吧啦。

 

極品9：用人唯親型

　　淨係照住自己心腹（通常係擦鞋仔），無論其他員工幾做得嘢，升職加薪這些機會都不是你的。

 

　　應對招式：除非閣下有信心成為心腹，否則就搵定後路。無機會上位不特止，假如有日畀擦鞋仔講幾句壞話，你就係咁先。

 

極品10：過橋抽板型

　　公司啱啱成立或有新Project要搵開荒牛時，打哂人情牌，拍晒心口話之後有得升、又Bonus又盛。到上咗軌道，就一腳踢開班牛仔，各種賤招陰謀詭計出齊，逼你自動辭職（代通知金都慳番），再用超低價請個新人。

 

　　應對招式：賤人何其多，＿得幾多個？與其日日詛咒佢，不如換個角度諗：做開荒牛嘅經驗好寶貴，放落CV好好包裝，得到嘅一定比詛咒佢多。

 

　　世途險惡，人心難測。希望以上一招半式能幫各位轉危為機，保重！

 

Source: ctgoodjobs.hk

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票