2014-11-05
HR藐嘴反眼7大口頭禪
「7」,因為是7,真是7句「講少句當幫忙」。有時候,「講咗等如無講」都算,最攞嚟衰的是講完被人藐、被HR/ 面試官踢出局。以下7大HR藐爆口頭禪,麻煩各位求職者拿拿臨「戒口」。
1、Um……、Well……
HR藐嘴反眼:「最頂唔順有啲求職者句句都Um Um Um,Um足10萬次都講唔出重點。下下咁load法,我就『No』咗先喇。」
墊底︰回應問題前,諗清諗楚是應該的,但諗嘢係唔使發音架囉!另外,見工面試前多做準備工夫,有備而戰,Loading time自可縮短。
2、憎死xxx(前公司/ 前老細/ 前同事)
HR藐嘴反眼:「嘩!你咁鬧啲ex,請你返嚟做同事,下次被毒舌嗰個咪係我?!」
墊底︰做人要有口德,對於前僱主等一切的負評,求職者務必忍口!就算心底裏真是好憎好憎,就留在心底裏好了。特別提醒求職者,見工面試前最好清空內心情緒垃圾,以美好心情迎接美好事。
3、完美主義者
HR藐嘴反眼:「哈哈!真係咁完美主義,就唔會再用呢個term喇。Bye。」
墊底︰又一個用到爛、講到虛的虛詞。被問到弱點,還是老老實實答吧。否則,「不自量力」就是閣下的死症。
4、我咁咁咁、我咩咩咩、我點點點、我我我
HR藐嘴反眼:「經常將『我』掛喺口邊,簡單嚟講,即係自我中心啦!」
墊底︰求職者要有自信,但亦不能自我感覺良好到以為世界圍著自己公轉。面試回應問題時,千萬別忘了帶出對工作及應徵公司的關注。
5、我想學下xxx、希望學到yyy
HR藐嘴反眼:「我都好欣賞好學嘅年輕人,但唔好意思,我地今次唔係入學申請。」
墊底︰「好學」唔係唔得,但求職面試重點應放在「我可以為公司貢獻啲咩」,而不是「公司可以為我帶嚟啲咩」。
6、有啲、都幾咁啦
HR藐嘴反眼:「一就一,二就二,你咁樣點出大場面?」
墊底︰含糊不清模稜兩可,不代表「易話為」,而是無主見、欠自信、輕佻的表現。
7、我盡量試下…
HR藐嘴反眼:「咁,我地都盡量試下請第2個,或者盡量試下唔揀你啦下。」
墊底︰簡單一句「我會努力」或「我一定畀心機」,來得堅定、具說服力得多。
Source: ctgoodjobs.hk
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情