2013-12-25
揭「鱷魚頭老襯底」真面目
「你幫我同佢講丫。」同事H弱雞聲,請我代他向強勢黑面神B交代工作詳情。
「你覺得,會唔會你親自同佢講清楚啲呢?信息喺傳遞過程,每次自然流失約70%。而家你同我講,我再同佢講,佢實際接收只有9%……」
「唔該丫……」H以哭求的聲線插嘴。
「你先要話我知你點解咁驚佢。」我討價還價。
「咁都要問?成個office係得你同佢講到兩嘴。我地邊敢惹佢。」H眼裏流露仰慕之情,我毫不客氣照單全收。
事實上,不是我有甚麼本事點石成金,或令頑石點頭,只是在叫做「職場」這個鱷魚潭吃過幾口鹽,太知道世界上有人燥底、有人奸底、有人深不見底、有人怕蝕底……還有一種人「鱷魚頭老襯底」。
「鱷魚頭」者,外表強悍兇狠,不但無人埋到身,不出聲時簡直會食人咁款;「老襯底」者,不是生活白癡,就是社交低能,例如經常性忘記繳付各色各樣的賬單、撳完機卻不提款、用錫紙叮爆微波爐事件不計其數、明明被搵笨反而自責太卑鄙……兼備一切被人烚到上心口的特質。
「鱷魚頭老襯底」的人,說穿了,就是嚴重缺乏安全感,悲劇式地以窮兇極惡的外表,掩飾「老襯」的本質。只要係咁倚認識他們,就知道他們沒甚麼好怕,而且更多時候,要「搵番佢地笨」是易如反掌的事。
「你知唔知出面班人好驚你?」我向B chok出一個奸到出汁的微笑。
「哦,得啦。」B輕描淡寫。
「咁樣真係好咩?」我追問。
「咁你答我,你成日做埋啲親善先生、友誼小姐嘅角色,又真係好咩?」B更木無表情。我低頭不語。
「哎呀,無嘢啦無嘢啦,我亂講之嘛……」他連忙sorly sorly,生怕傷害到我脆弱心靈。
「你又輸咗啦!哈哈哈!」我得戚。
要對付「鱷魚頭老襯底」就是這般不費吹灰之力。相比起「扮豬食老虎」偽君子,與「鱷魚頭老襯底」相處簡單舒服得多。
原文刊載於ctgoodjobs.hk
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【慎防受騙】偽冒《經濟通》投資群組頻現,切勿誤信騙徒,如有疑問,請循官方渠道查詢► 了解詳情