護士：「要唔要收據？」

 

　　偉忠：「要。」

 

　　好多人言之鑿鑿，「退休」無乜細藝，鬥志鬆懈咗，抵抗力差咗，病痛特別多，我「退休」日子尚短，唔知啱定錯，但「退休」循例搵醫生做下檢查，正常不過，但唔記得已經無得claim保險，醫生收據要嚟做乜喎。

 

　　原來「退休」唔止唔做嘢咁簡單，好多嘢都會唔同咗，醫療保險就係其中一個例子。以前有，唔多覺重要，而家無，個心若有所失。

 

　　現實中，無論係咪口響響唔驚死，個個怕纏綿病榻，又怕畀唔起高昂醫療開支，寧願做耐啲做長啲，「退休」拖得就拖，只要有醫療保障。

 

　　記得三月初，「退休」消息通天，老朋友來電，一針見血：

 

　　「夠唔夠錢，有無醫療保險。」

 

　　「慳慳地，唔賣樓，勉強捱到20年。」

 

　　「既然有啲勉強，點解唔儲多兩個錢，我幫你搵番份工。」

 

　　朋友緊張過我，人間有情，又一例子。

 

　　我嘅諗法啱啱相反，就係因為驚老來多病痛，唔應該有事發生至講「珍惜眼前人」，人生匆匆，唔應該淨係將黃金歲月放喺工作之上，應該預早做好財務準備，只要經濟許可，適當降低物慾要求，趁行得走得，盡早由工作舞台退落嚟，享受另一種恬靜人生，有得懶就懶，有得玩就玩，總好過做到老一老，行都行唔到。

 

　　人算不如天算，唔會有百分百穩陣嘅退休預算，過分小心謹慎，秒秒步步為營，一啲都唔痛快，有時大安旨意，隨遇而安，反而更加快樂，唔要醫生收據就唔要囉。 

 

轉載自: 晴報

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇