三十年嚟，轉工唔計數，未試過一日銀包入面無卡片，今日「退休秘撈」，好多人繼續問我攞卡片，其實無再用啦，銀包薄咗，行路輕快咗，全新經驗，幾爽。

　　好多退休人士，無得派XXO卡片，身份象徵唔見咗，心有戚戚焉，無論以前幾風光，幾咁萬人之上，即刻雄風不再，好似霸王卸咗甲，周身唔聚財，好唔慣喎。迷失自我真可憐，貪慕虛榮無藥醫，卡片其實只係一張紙，沒有卡片的日子，真正嘅身份剛剛開始，就係自己的名字。

　　八年半前，合約寫明CEO職銜，我偏偏唔鍾意。一間人心散渙嘅公司，忽然空降三唔識七嘅總裁，多多少少有救亡大權話晒事嘅意思，對建立互信關係，改善員工士氣，毫無幫助。決定自把自為，唔理得董事局咁多，印咗張常務董事卡片，令外界以為我只係其中一位董事，降低媒體注意，減低內部心理抗拒情緒，結果成功咗。

　　四年後，此一時彼一時，決定轉變推廣策略，用番CEO銜頭，背後有一個非常重要嘅商業原因，三言兩語好難解釋清楚，大家不妨估一估，將來有機會開故。我淨係想講畀大家知，卡片銜頭，對工作有用就重要，無用就唔需要重視，廿一世紀嘅今天，社交媒體橫行天下，有特色風格嘅個人品牌至值錢，使鬼派卡片。

　　經常提醒自己，如果靠父幹，靠銜頭卡片，至有人尊重喎，有乜咁馨香。今時今日，無官一身輕，名利虛銜一啲都唔重要，唔再需要卡片，因為我最重要嘅身份只有「莊偉忠」三個字。 

轉載自: 晴報

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票