《小傳日記》魚缸上星期五就好似發咗一場夢，乜嘢１７００億成交呀，１８０００點呀都好似ｄｅｊａ　ｖｕ咁隨風消逝，結果一到９月就打回原形，每日唔過千億，一係打和一係跌，港股始終係港股。大家都無心戀戰，連大紅籌都要分多份中期息出嚟「息誘」缸友，當然都唔少得回購，而今年大牛皮，回購量更加創出新高度。　　有內媒就為魚缸計一計數，原來年初截至９月３號，總共有２２５隻股份做過回購，比上年多同期多咗８９間，合計使超過１８０６億銀，比上年同期多咗足足１﹒７５倍！無論係做過回購嘅公司數目，同堆總回購額都創同期歷史新高。　　截至同期，回購最多嘅竟然唔係大笨象滙控（００００５），而係ＱＱ（００７００），喺八個月多啲嘅時間入面總共使咗７４３﹒８７億銀回購，比起第二位滙控嘅２８８﹒４６億銀多出１﹒５倍！可能係因為派息唔多，ＱＱ就喺回購方面鬆手得多。至於第三至第五分別係美團（０３６９０）、ＡＩＡ（０１２９９）同小米（０１８１０），累計回購分別係２２９﹒２６億、２２７﹒２９億同３６﹒７７億。而單計ＱＱ、滙控、美團同ＡＩＡ呢四大回購王，就已經佔咗總回購額嘅８２％！　　今年魚缸表現麻麻，雖然而家叫回穩咗，但唔好唔記得年初試過跌穿１５０００，上面呢四大回購王當時都應該日日重錘回購，令到今年嘅回購額多咗咁多。魚缸而家咁嘅市，稍為穩陣少少嘅投資者都唔敢亂入市，所以揀股都係睇著幾個關鍵字：「穩陣」、「高息」、「回購」，中呢幾樣包無死。　　雖然回購有利托價，但講真唔跌又使乜托價，有錢不如攞去搞好盤生意，用嚟回購對於公司發展嚟講一定唔算係最好選擇。所以魚缸回購額創新高，著實係唔算太馨香，但有好過無咁囉，畢竟都係支撐缸友留喺魚缸嘅一大動力，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票