今日阿里巴巴(09988)公布業績，似乎公司開始進入「呆滯期」，增長動力唔再有好明顯增長，而外間似乎都接受左呢個現實，預期業績同實際業績都差唔多。

　　點解會咁呢？阿里巴巴已經發展發展至今已經超過20年，當年睇住亞馬遜興起，認識到中國靠住人口紅利，必然可以帶起網上購物熱潮；事實上，「阿里巴巴產業鏈」確實養起唔同行業，例如供應鏈、物流業、手機業等等，早已成為「大到不能倒」的企業之一。

　　但神州同胞開始富有，所以對於「平價」商品要有更高要求，從線上體驗發展成線上X線下體驗，整個中國消費出現結構性改變。可以肯定地講，阿里網上購物業務係一個穩定現金流嘅業務，唔會有太大增長（你睇近呢兩年雙十一就知），其實對手京東都係差不多，所以無咩討論空間。

　　但阿里係咪無前途呢？又唔係啵。因為阿里其實係好早一批發展「雲業務」企業，呢個先係科企「彎道超越」核心業務，博客認為，神州未來二十年會進入「科技增長高速期」，例如低空經濟、物聯網、自動駕駛甚至WEB3.0，雲業務提供嘅不單單係儲存空間，而係運算力，邊一間價錢越低、算力越高，就可以爭奪市場。

　　睇得出，阿里呢次發行優先無擔保票據，呢次籌旗相信都係為雲業務發展更落足力，除咗阿里之外，目前競逐雲業務嘅企業仲有騰訊(00700)、百度(09888)、中移動(00941)、中電信(00728)呢堆大佬，求其一個退出就會被其他人食埋市場份額，所以呢場賽事唔係跑六、七公里嘅格蘭披治大賽，而係350公里嘅拉力賽，鬥長命、鬥技術、鬥水平！

　　至於睇唔睇好阿里，博客認為，如果係處理投資組合(Portfolio)，阿里必須係張list入面，因為技術超彎呢家嘢你唔會知幾時，所以可能睇十年起跳；短炒/中長期而言，而家公司未見有咩動力，暫時觀望啦都係。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】etnet全新頻道盛大推出！全港最齊盛事活動資訊盡在掌握！► 即睇