呢期市悶悶地，反而個股就好多花生，例如由愛國商人曾憲梓所創辦嘅金利來集團(00533)今日炒高三成七之後突然停牌，成交金額高達3100幾萬銀，而過去呢排平均成交額都係得十幾萬。

　　正所謂：「真是荒謬，把自己看得那麼高！」，呢句由曾憲梓講出來嘅金句，網民廿幾年後都仲記得，而股價都「看得那麼高」，市場估計都係同私有化有關，有春江鴨收到風拿拿聲買入，惹來其他人不問價掃貨。

　　究竟金利來值幾多錢、私有化每股幾多錢好？呢個題目就十分有趣，博客搵搵公司資料，公司單係現金就有10億多少少，除開9.7億總股本，每股起碼1.1元，仲有公司香港同大陸業務、物業投資等等，究竟值幾多真係要問問黃龍德。

　　不過值幾多，同公司拎幾多錢出來私有化，又係兩件事；但呢個時候做私有化確實係最好時間：成交量多返，恒指仍處於低水。

　　不過，作為愛國商人家族，剛剛上面先呼籲商界唔好咁自私，話明「香港不能靠傳統優勢一招鮮、吃遍天，必須銳意改革、主動作為」，而轉個頭公司如果真係私有化，究竟可以點呢理解呢個行為，大家就自行解讀啦。

　　利申返，截至出稿呢一刻，公司都仲未出新聞，以上內容都係博客自行解讀，投資者請留意。

《編者按》本欄搜羅即市傳聞，惟消息未經證實，《經濟通》亦不保證內容之準確性。

【香港好去處】etnet全新頻道盛大推出！全港最齊盛事活動資訊盡在掌握！► 即睇