《經濟不停學》經濟學101：美國國債掌握全球經濟命脈？

　　早排美國因為債務上限問題而差到搞到國債「違約」，究竟美國國債點樣影響到全球經濟命派呢？原來所謂「印銀紙」並唔係齋咁印出來，而係同美國國債有關；成日聽到「孳息率」、「債息下跌意味市場避險」，呢堆概念真係好複雜好難明囉！所以今次經濟學101又幫大家清清Concept，等大家深入淺出咁理解美國國債係咩玩法！

 

 

國債概念要清楚，孳息率票面率係兩樣東西！

 

（iStock圖片)

 

　　「國債」簡單來說就係由國家發行並作為擔保嘅債券，買入嘅人就係國家嘅「債主」，國家就係「債仔」，國家從國債獲取收益，然後定時定候就會向債主「派息」，派完整個時期，國家就會同你贖回你呢份債券，將本金歸還俾你。購買國債好處在於穩定，因為假如國債都違約即係意味國家十分唔掂！而美國國債係目前世界最安全嘅國債之一，皆因從來未試過違約、派息穩定，所以係資產避險嘅最佳工具。

 

　　國債經常講「孳息率」、「票面率」兩個概念，究竟呢兩樣係咩呢？票面率(Coupon Rate)即係張國債所訂立嘅固定派發例率，例如一張國債票面值係1000蚊，票面年利率係5%，持有國債嘅人士憑呢張國債係一年後收到50蚊作為利息。但國債可以買賣，而國債價格係會浮動上落，所以為衡量整體投資收益，投資者較為看重孳息率（Yield）。

 

　　用返上述例子，一張一年期國債票面值係1000蚊，票面年利率係5%，即係孳息率（收益率）同樣都係5%；假如呢張票面值1000蚊嘅國債，我要急住出售，所以要降價900蚊沽出，咁孳息率就係：整張債券可得收益/當前價格=50/900=5.56%，呢張債券嘅孳息率就係5.56%啦！由此可見，當債價下跌，孳息率就會上升，反之亦然。咁有咩影響到債價浮動呢？就係當市場資金需要避險時後，大量資金衝入債市，令債價上升，孳息率就會下跌，所以大家成日咁流入個孳息率浮動，就係理解緊資金去向啦。

 

量化寬鬆靠國債，無國債印唔到銀紙

 

 （iStock圖片)

 

　　自從70年代經濟危機，美國脫離「金本位」之後，就開啟「債本位」之路，美國聯邦儲備局將「美債」作為一種資產看待，目前美國所印發嘅美元，都係以自身持有幾多「債券」而發行。概念上，由於黃金儲備有限，所以「金本位」時期嘅美元印發都係有限；但債券可以無限舉發，所以原則上美元都可以無現咁印，因此美元就有「印銀紙咁印」呢個傳說啦！

 

　　咁點解大家都信呢張「美元」呢？一來美國作為世界大國，有強大影響力，包括政治及軍事上，所以唔少國家將美元作為儲備貨幣；二來石油都由美元結算及計價，有佢嘅作用性。所以當美元需求大過供給情況下，就算佢「印」幾多都好，美元都穩穩陣陣，因為大家都講個「信」字，只要美國一日強大，美元都係強勢主導地位。

 

　　至於咩叫「量化寬鬆」呢？其實即係聯儲局印好一堆堆美元，之後向市場上嘅金融機構或者銀行，購入國債、房貸債券等證券，咁市場上現金多左，債券少左，市場融資成本降低，有利經濟發展；相反，假如市場過熱、通脹率高企，聯儲局就會進行「量化緊縮」，即係寬鬆嘅逆向操作，透過縮減資產負債表及加息等方法，收緊金融市場的流動性。

 

美國國債有機會違約？皆因債務係有上限的！

 

（iStock圖片)

 

　　其實美國憲法有列明，美國債務係有上限，但自1960年開始，美國債務上限已經上調了共78次，大約每8個月就要上調一次，所以條法例唔講以為佢已經唔存在啦！不過，近期共和民主兩黨大搞政治show，共和黨係取態上，似乎唔想再上調債務上限，認為民主黨應該為債務問題負責；假如唔調整上限，政府無錢拎去還舊債，美國就會出現債務危機，有機會出現例史上美債首次違約！

 

　　出現違約會有咩問題？只要美債出現首宗違約，就有機會出現「交叉違約」情況，其他未到期嘅債務都會出現信心危機，出現連鎖反應，到時有機會引起美債集體沽售，而債務危機亦會影響到貨幣信心問題，美元必然受到影響；最重要係，中國、日本等國家係美國最大嘅幾個債主，假如美國無錢還，同樣會牽連到其他國家收益。所以話，美債幾乎影響到全球經濟命脈，所謂「你欠銀行一萬，你怕銀行；你欠銀行一億，銀行怕你」，更何況美國欠落全球咁多錢，睇來都係其他國家怕怕多啲啦！

 

撰文:李皆穎

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情