《經濟不停學》荷蘭好叻，創造股票市場，仲有史上首個經濟泡沫！

　　投資市場成日都講金，但講得多難免成身俗氣。今日就嚟談談歷史，原來股市嘅起源喺嚟自荷蘭，股票交易原理同依家差唔多，荷蘭人仲身先士卒幫我哋試下經濟泡沫爆破係咩滋味，睇完先知道規管同透明度係咁重要㗎。

 

 

(Shutterstock圖片)

 

荷蘭國企發行世上第一張股票，原來係想分擔風險

 

 

(Shutterstock圖片)

 

　　喺好耐好耐以前……16世紀歐洲變革，經歷一輪戰爭之後，我哋認識嘅荷蘭由西班牙帝國獨立咗出嚟。而打仗果陣一班有錢佬、生意人同技術工梗係要搵地方匿啦，佢哋當時去咗阿姆斯特丹，而呢個地方天然資源原來好豐富；可以想像到，當一個地方有人、有錢、有地理優勢，想唔發都幾難呀！於是到咗17世紀，阿姆斯特丹已經成為當時世界上最重要嘅港口之一，金融業更係活躍到令佢成為歐洲嘅金融中心。

 

　　當時賺錢嘅方法主要係行船做貿易，但其實行船喺當時嚟講係好高風險嘅，可能會畀海盜打劫啦、水手暴亂、遇到海難、有傳染病，任何一樣嘢發生都有可能連人帶船全滅。為咗降低風險，一間國營企業荷蘭東印度公司（業務超多元，貿易之外有做僱傭兵、發行貨幣、開闢殖民地等，可以當佢做綜合企業）居然諗到條絕世好橋，就係發行50荷蘭盾嘅憑證，揸足三年之後，就會分到150盾。就係咁，佢哋係1606年就募資3650萬荷蘭盾。

 

　　不過，事實上東印度公司覺得要分紅畀人好蝕，於是請人向等錢使嘅股東度買番憑證，再高價轉賣，於是1609年世界上第一個股票交易所「阿姆斯特丹證券交易所」就咁誕生啦！荷蘭人咁精明，難怪「Go Dutch（AA制)」都係以佢哋命名！

 

鬱金香花球造就期貨市場雛型，仲篤爆咗個泡

 

 

(Shutterstock圖片)

 

　　一樣新興事物發展得快，係就係可以飲頭啖湯，但另外一個角度睇就係行先死先，有傳荷蘭同樣創造咗史上第一個經濟泡沫，「鬱金香泡沫」。呢一個泡沫嘅源頭相當眾說紛紜，總之當時鬱金香花種引入歐洲嘅時間好短，數量有限之下價格當然貴，得啲貴族先買得起，為咗體現身分，達官貴人紛紛追捧珍貴品種嘅鬱金香，令花花價大幅飆升，並吸引投機者加入炒作。不過好似上面咁講，由於阿姆斯特丹好搵得錢，當熱錢流晒入一個「孖屐」嘅負面影響就係通脹。

 

　　因為實在太鐘意鬱金香，果陣個價顛到飛天，有指一棵名為「總督」嘅鬱金香球莖，價值3000荷蘭盾，可以交換包括８隻肥豬、4隻肥牛、兩噸牛油同一千磅芝士等等等等，而當時荷蘭人平均年收入只有150荷蘭盾。因為花係容易凋謝，所以投資者所交易嘅，只係連開咩色都唔知嘅鬱金香花球種莖，但一年四季都Trade得，商會仲開展「合約買賣」方式交易，根本係做緊期貨買賣，花球票據咪又飆升囉。

 

　　後尾到1637年2月初，市場開始出現大量鬱金香，原本觀賞嘅買家因為太貴而唔買，市場一下子有大量存貨，又搵唔到買家，鬱金香價格一下子暴跌90％；而普通品種嘅鬱金香更加一文不值，於是個泡沫就爆咗啦。

 

　　最終政府作出咗「允許買主在支付合同價格的3.5%之後中止合同」嘅決定，令票據失效。雖然好多人係一日千金散盡，但「股票」、「期貨」呢種概念就繼續順延開去，直到今日啦！

 

撰文：吳藹林

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇