按摩椅惹的禍？

　　很多中年朋友喜歡工餘時間歎按摩椅，以下真人真事可作參考！

 

　　過年前，老同學聚餐，見到「靚芳」步入。咦，乜瘦咗三份二嘅呢？

 

　　大家行到呢個階段，年紀大，機器壞就肯定㗎嘞。所以，個個會小心保養，但始終無法完全避免種種疾病侵襲。若發覺體重驟然急降，一定要搵醫生查找原因。

 

身體是副機器，長年下來必走下坡，但若保養得宜，健康生命周期可以很長。

任何成年人，尤其長者，突然劇瘦，是極大警號，須火速驗身。

 

　　通常， 六十幾歲急瘦，不外乎：一、抑鬱症；二、糖尿病；三、癌症（健康細胞被侵蝕）。

 

　　總之，唔係好嘢！

 

　　多口問句：「阿芳，你發生乜事呢吓？」

 

　　「唉……總之，苦不堪言喇。三個月前開始，冇情情腰骨脊椎神經痛，搞到坐立不安，上床落床痛苦極，連刷牙綁鞋帶都唔掂！」

 

　　「有冇做針灸推拿物理治療呢？」

 

　　「乜都做齊。照都照咗幾次，但一直搵唔到原因。瞓又瞓得差，睇住自己日比日瘦，真閉翳。最慘，唔知乜事，只好不停轉醫生。終於，兩星期前有轉機！」

 

　　係乜呢？正是撞到一位脊醫。問阿芳：「你有冇日日坐按摩椅習慣呢？」

 

　　「有啊，三個月前老公送咗張按摩椅畀我，三萬幾蚊。於是，日日坐住煲劇及夜晚睇YouTube。每日幾個鐘邊坐邊按摩！」

 

　　「唔……你已經唔係第一個，極之有可能被按摩椅弄傷脊椎及神經！因為，按摩椅設計千篇一律，並不會為每個人的體質及骨骼神經位置度身調較。人年紀大，骨質當然退化，就算人手按摩，技術差，亂按或用錯力，都會受到傷！按摩椅內的鋼珠在你背上亂碌，力度可能相當猛，或許你就此被弄傷。」

 

辛勞一天後被按摩椅包著，很舒服。但其強力鋼球不停壓下退化的脊椎，可能潛藏危險！

 

　　脊醫建議「靚芳」，立即停用按摩椅。然後，每日有紀律地做柔軟體操及拉筋。終於，兩星期下來，痛楚減退才有心情再見人，出來同學聚會。

 

治理腰椎受傷，沒有特效藥，必須長時間做醫學物理治療及天天拉筋。

 

　　其實，「靚芳」個案，救咗我。因去年底，小弟一模一樣，買咗張強力按摩椅做自己新年禮物，當然日又用夜又用。

 

　　果然中招！腰骨日比日痛，完全唔知乜原因。上天打救，終於十日前遇上「靚芳」。聽完佢慘痛經歷，當然立即停用按摩功能，只坐不按。

 

　　第一身體驗，立時脊骨痛慢慢消失。

 

　　今時今日，歎按摩椅成大潮流。小弟及「靚芳」經驗，希望幫到大家！

 

身體健康，筋骨柔軟，就是基本快樂生活的保證。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票