香港人，近年郁下都走上街示威，無論建制派或泛民皆如是，閒過立秋。

　

　　抗議主題乜都有，政治當然多，民生也不少，至於價值觀(例如同性婚姻合法化)爭取的亦愈來愈頻密，正正反映香港仍享有內地中國人未能享有的自由，大家必須堅決維護。

　

　　不過，睇來睇去，小弟認為最應該全港百萬計打工仔走上街抗議的主題，仍未浮現。就是－－打倒強積金制度！還我退休投資自主權！

　

　　強積金出現，不能說是壞事。事實，單靠打工仔自由地自己顧自己，非常危險。因為，不少人對退休部署，毫無計劃可言，甚至儲蓄，亦毫無紀律性。如此，晚年生活誰來埋單？當然要全港守紀律、有部署者替佢地分擔，何其不公平？

　

　　所以，強逼打工仔儲蓄，甚或在保本安全情況下，替佢地投資，實在有需要。

　

　　不過，香港強積金制度設計，非常古靈精怪，更不尋常地明益跨國大鱷基金集團，令佢地可以明搶豐厚佣金，打工仔根本綁住任由抽水。

　

　　更離譜，種種基金設計中，冇一種可以乾淨俐落買盈富基金(02800)，為乜呢？似乎到今天，仍未有一個政府官員夠膽又或有說服力企出來解釋－－點解無俾打工仔用最安全、最少被抽佣金方式去供強積金？

　

　　結果，打工仔只可從各種巧立名目類別中選擇強積金，經常蝕完價再被抽重重佣金。小弟作為資深投資者，眼冤又憤怒，實在無法理解政府其實搞乜鬼，硬要堅持這個「明益國際基金大鱷」設計，有不可告人的背後目的嗎？有「官商勾結」嗎？（不合理的改革最易引發陰謀論！）

　

　　今日好㷫，因又見打工仔被綁上戰車陪葬，強積金近三個月人均蝕超過2萬元，等同輸掉14個月供款！！！6月至8月更慘情，整體累跌9.43%。本來，「願賭服輸」，事實，過去幾個月股票、外幣、債券全軍盡墨。不過，慘在此時此刻，基金經理仍收重鎚佣金，無論表現好壞，都印印腳先斬一筆，永遠有獎冇罰，實在有違天理！

　

　　最甚，打工仔只得供款一個選擇，明知未來幾個月將會大跌市，仍要被逼綁死。強積金變「陪葬金」，實在搵笨。究竟，幾時才會出現「反對強積金制度大遊行」呢？預我一份呀！

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇