【狗狗也打工】$2000一次出場費！4種「狗工」你聽過未？

　　各位打工仔，狗年快樂！為咗迎接狗年，小編決定要為咁多位「狗狗打工仔」寫返篇文，等你地呢班（愚蠢嘅）人類都知道──「工，唔係得人先可以打㗎！」

 

1. 導盲犬

 

（《導盲犬小Q》劇照）

 

　　被稱為「盲人的眼睛」嘅導盲犬，大家一定唔陌生啦！但原來做導盲犬要「睇血統」㗎，只有性格極之温馴、不具任何攻擊性嘅拉布拉多犬、金毛獵犬、德國牧羊犬先做得！

 

2. 模特兒

 

　　狗做模特兒你聽過未？只要狗狗長相夠可愛、身材比例勻稱，而且任何時候都充滿活力，就有機會喺各大小品牌嘅狗糧、沐浴液等廣告上現身，甚至可以成為寵物專業美容大賽嘅常客添！聽講喺揚州，就有狗model賺緊$2000一次出場費！

 

3. 美術館管理員

 

（圖片來源：美國波士頓美術館）

 

　　美術館藏品豐富，而且大部分都是價值連城嘅珍品，所以最怕有蟲害問題！早前美國波士頓美術館就引入咗一隻名叫Riley嘅威瑪獵犬，專門係館內驅逐害蟲，防止藝術品受損！原來除咗加強滅蟲措施之外，請隻「狗狗管理員」返嚟解決蟲害都係一個好方法！ 

 

4. 舔郵票專員

 

（網上圖片）

 

　　呢個世界上竟然有份工叫「舔郵票專員」，仲要係由狗狗擔任？話說喺蘇格蘭斯凱島（Skye）嘅一個海邊小鎮波特利（Portree），有位郵局局長竟然請咗佢隻狗狗Jax返嚟幫客人舔郵票，氹到班居民不知幾開心！不過局長話，其實Jax嘅工作表現記錄唔係太好，因為佢有時候會舔郵票舔到吞埋張郵票落肚！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇