與面試官的角力！了解問題背後所代表的意義！如何有技巧地回應「你有乜缺點」？

　　大多應徵者都趨向「搵工公式化」，每一份工都用同一份CV template、面試前背熟一式一樣嘅自我介紹、準備定一條問題問面試官等等。應徵者只會講自己想講嘅事情，卻忘記對方真正想聽到嘅內容。「為講而講」變成常犯嘅毛病，未能了解面試官同自己嘅角色，以及每條問題背後嘅真正意義，最後有可能答非所問，繼而令面試氣氛變差，更令對方對你產生負面印象。除咗上星期談及過嘅面試提問要注意之外，以下兩條面試官嘅問題亦要小心應對。

 

Read More：見工是一場角力！重新思考最常見提問，如何增加成功機會又保住自我底線？

 

「你有乜缺點？」

 

　　其實講優點同缺點都好難，講優點時要讚自己得嚟，又唔可以太明顯；講缺點時數自己不足之處時，又唔可以令人覺得你一文不值。但其實回答嘅重點唔在於你有幾多優點缺點，而在於你對該職位相關嘅primary／secondary competency （首要／次要勝任能力）了解有幾深。如果十分清楚以上問題，要真誠地數出自己不足之處，都未必一定影響你面試成功嘅機會。

 

　　較有系統嘅公司，請人前會列出該職位嘅首要／次要勝任能力，之後會同應徵者作配對。舉例，該職位首要要求係：創意力、英語能力，而次要係溝通技巧、普通話能力。當你道出自己嘅缺點時，盡量避開提及同首要能力有關嘅問題，只輕談同次要能力有關嘅事，其實唔會令面試官覺得你好大問題。另一方面，好多人會嘗試將缺點變成優點後作回應，其實呢個方法多數情況下都較難操作，搞不好反而會令人覺得你虛偽。所以如果你嘅演說技巧唔係太好，建議真誠地回答，係最好不過。

 

　　仲有一點要注意，當你準備面試時，已經發現自己嘅缺點同首要能力有太大出入的話，即表示該職位未必適合自己，咁就有必要再三思。

 

「最後，你有冇其他問題？」

 

　　其實整個面試過程中，每條問題都係希望對方更了解你之餘，亦想令對方對你加深印象。通常整個面試過程都係由面試官主導，而最後嘅問題則由應徵者主導，但呢個情況應徵者都會犯下一啲小毛病。第一，應徵者面試時因過分進取，提問時嘅語氣令對方有被質問嘅感覺，繼而令人對你十分反感。雖然你唔係專登，但要表現出你好想了解公司更多、你對呢份工作好有熱誠，同時又唔可以提問過分尖銳，或問及一啲唔能夠透露嘅內容，事前要做多點功夫，了解工作內容同面試官嘅背景，免得自製炸彈。

 

　　另外，亦要盡量避免提問一啲有機會被反問嘅問題，如「如果 貴公司出現XXX情況，公司／部門／你會如何處理？」，類似嘅提問會令人覺得你好似反過來interview對方，同時如果對方係有經驗嘅面試官，佢會立即反問「咁如果係你，你會點做？」，最後令自己失去一個問問題嘅機會。所以當提問前，自己亦要準備答案，免得令人覺得你只有機械式提問，而冇自己嘅思考及判斷。

 

　　其實去到面試嘅尾聲，面試官都已經心裏有數，最後一條提問未必可以扭轉大局。所以要抱住平常心，冇需「為問而問」，爽快完結可能仲嚟得更自然，令對方感到你處理得宜。

 

　　面試係一種另類嘅溝通場景，除咗事前要準備內容之外，亦要了解對方嘅思考模式同每個提問嘅目的，先能完完全全善用面試嘅每一分鐘，令自己突圍而出。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票