【初出茅廬】掌握合適工作節奏，「行得」或「停得」太快都不適宜！

　　好多剛踏入社會做事嘅打工仔，都未必懂得掌握自己嘅「節奏」，不論係每日恆常工作，還是係career path，都會因為「行得太快」或者「停得太快」而失去自己嘅節奏。行得太快嘅後生仔，會抱住「我要做大事」、「我要改變呢個世界」嘅心態工作；而停得太快嘅人，會抱住「大事唔好搵我」、「我要快啲穏定下來避世」嘅態度處事，呢兩種人都各走極端，令他人喘不過氣，最後亦辛苦了自己。

 

　　以前喺一間較多年青人嘅公司工作，大部分同事都滿腔熱血，畢業後一心要「做大事」，但好多時都係事與願違。剛剛大學畢業嘅Toby，工作五個月，但前後已經向我請辭三次，「經常要我做呢啲細微細眼嘅工作，根本睇唔到我實力所在，如果經理肯畀更重要嘅工作我處理，我一定做得好好睇睇」。當時我有啲失望，試問如果連做小工作都錯漏百出的話，又點能夠畀信心別人將重要嘅事情交到你手。

 

　　經常埋怨無被公司重視，甚至乎埋怨人生都無被重視過，覺得自己永遠都係大才小用，明明係GPA爆燈名牌大學畢業生，但返工只係幫手入data、做簡單research，根本無發揮空間，每日不停埋怨，最後就係跌入牛角尖之中。

 

　　停得太快嘅打工仔亦唔少，佢哋一出嚟工作就已經準備停下來，經常抱有「唔升職唔緊要，最緊要有人工加」嘅心態工作，搵工時只希望工作係「唔多使用腦」。佢哋嘅宗旨係唔好做多，亦唔好做錯，捱到65歲前唔畀人炒就心滿意足。常常掛喺口邊話自己見慣風浪，但實情佢哋只係聽人講過，但自己就從未面對過。當有事情發生時，佢哋永遠無實質行動同建議，以為自己行出嚟係「指點」，但其實係「指指點點」，然後就行返埋位。

 

　　大部分人都想追求安穩，呢個絕對唔係一個錯嘅想法。但如果未見過風浪之前，已經唔敢面對風浪，只會令自己見識愈來愈少，危機感愈來愈低。最後會變成食過一次劣質魚子醬後，就斷定所有魚子醬都係唔好食；學一次踩單車失敗後，就覺得自己永遠都唔可能識踩單車。太過後生已經開始諗停下來，亦係另一種可怕。

 

　　另一邊廂，日前我要求一位同事五日後提交一份小小嘅計畫書，但佢三日後已經交功課。

 

　　「我記得我係叫你五日後交，點解三日就畀我？」

 

　　「諗住早少少畀你望下先，如果有錯，我仲有兩日時間改嘛！」

 

　　其實工作嘅節奏各人有異，行得太快唔代表一定成功，永遠唔行亦唔代表一定安穩。每當埋怨或停下來時，諗諗自己嘅位置，從新掌握自己嘅節奏，先能夠安穩地做大事。  

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情