【見工穿搭】西裝、名錶、古龍水＝尊重？表現工作能力比一身「行頭」更重要！

　　噚日，舊下屬 Kevin 朝早喺世貿見工，所以我哋約咗一齊喺銅鑼灣食lunch。

 

　　我喺Simplylife搵定位等佢。十五分鐘之後，佢終於嚟到。

 

　　佢未坐低，我就問「你今朝見咩工？」

 

　　「都係In house咋，不過title係Senior Marketing Executive囉。」佢一路坐低一路答。

 

　　「啊，我仲以為你想轉行做倫敦金sales。」

 

　　我眼前嘅Kevin一身超窄身西裝配格仔馬夾克、Gucci monogram皮帶、啡色尖頭皮鞋，即時勾起我當年喺旺角荷里活中心買西裝嘅回憶。

 

坊間所說的倫敦金sales衣著。（網上圖片）

 

　　「你今朝倒瀉古龍水呀？」我再問。

 

　　「唔係啦，我帶埋支CK One喺身，入嚟之前噴多咗幾下之嘛。」佢答。

 

　　「咁你interview前實有再噴啦？」我再問。

 

　　「Of course，我特登行入廁所執執個樣先入去interview。」佢再答。

 

　　「”Skills me”，叫嘢食，唔該。」Kevin舉起咗手向待應示意。

 

　　呢個時候我發現Kevin左手戴住一隻白面地通拿。

 

　　「新錶喎。」我話。

 

　　「唔係啦，我老豆㗎。今日見工，我特登問佢借嚟戴，望落成熟啲嘛。」佢摸摸隻地通拿答。

 

定價約10萬多的ROLEX「地通拿」。（網上圖片）

 

　　「咁你隻結婚戒子呢？」我好奇。

 

　　「喺袋，見工戴住隻金戒子好似太張揚。」佢答。

 

　　嗰一刻我有啲想暈。

 

　　我知道呢位舊同事嘅工作能力其實唔差，而且喺舊公司嘅人緣亦算幾好，但憑佢今日呢一身打扮，令我有少少戥佢唔抵。

 

　　「你知唔知西裝最緊要係咩？」我問。

 

　　「靚囉。」佢 9 秒 9 答我。

 

　　「我就覺得西裝其實最緊要啱身。有幾靚嘅西裝但唔啱你身形，其實都無用。」我繼續「就好似你見工咁，唔係將所有最好、最貴嘅嘢擺晒上身就叫做尊重、就叫做好。有時都要睇下係咪適合。仲記唔記得當年我interview你，你著咩衫？」我問。

 

　　「咁耐邊記得，可能都係G記普通西裝呱。」佢答。

 

　　「其實我都唔記得，但我淨係記得你interview嗰時話到畀我知你對市場有sense、對呢份工有心。」我答，「見工成功之道在於喺interview嘅幾十分鐘內，向面試官證明到你就係佢想要嘅人。過多同過份嘅打扮只會引起考官不必要嘅聯想，甚至蓋過考慮你工作能力嘅因素。」

 

（網上圖片）

 

　　Interview短短幾十分鐘，面試官其實可以睇到好多嘢。除咗面對面嘅對答，candidate嘅衣著打扮、有無手尾、同公司其他人嘅interaction等都會被納入評分範圍。將重點放回工作位置要求、表現自己工作能力其實已經好足夠。

 

　　我講完之後，Kevin若有所思，然後問：「咁不如搵日你同我行下街，換過一批見工衫？」

 

　　「Sure，就今晚放工後？」我答。

 

　　「好喎，咁我約你八點，旺地恆等。有間我買開西裝嘅，我見佢Facebook話有新貨返。」Kevin 雀躍回應。

 

　　「Ok...」然後我繼續食我嘅 Eggs Florentine。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票