【另類貨幣】Chatbot不再是新鮮事！識得用「Like」變真銀才是大贏家

 　　雖然社交媒體已經進入咗3.0，但好多marketers 對Social 3.0嘅定位同運用都未係完全掌握。有人會定義Social 3.0係「內容行銷（content marketing）」，所以投放好多資源去「做內容」。亦有人會定義「Chatbot行銷」為Social 3.0，所以有一段時間大家一窩蜂搞Chatbot。但可惜到今時今日， Chatbot最為人常用就只係一啲類似「請留言『股票』，就會inbox你5隻收息股」等等嘅「留言inbox」內容。令人煩厭之餘，亦失去咗Chatbot嘅本義。

　　早年嘅Social 1.0，主要係最簡單直接嘅運用，Post 內容上Facebook，有朋友見到留言讚好，並無特別功能同策略可言，但因為大眾對社交網感到非常新鮮，所以大受歡迎。之後當大家開始適應咗社交媒體嘅玩法，Facebook、Instagram等等開始帶大家進入2.0嘅世界，開始可以同朋友間有雙向互動，朋友於社交網嘅足跡，亦會喺你嘅Wall上留痕。

　　其後透過大數據，呢個「雙向互動」開始變成「三向互動」，Facebook分析你嘅習慣同喜好，將適合你嘅內容出現喺你Wall上。所以去到Social 3.0，大多數人都認為「三向互動」會變成「智能互動」，AI 智能會進駐社交平台，大眾除咗同朋友／ 品牌互動，AI 亦會同你交流。但其實「智能社交」係一個非常遠嘅話題，要做到真正智能化而安全的話，相信仲有好長嘅路，到時可能已經係4.0嘅事。

　　喺未到完全智能化之前，其實Social 3.0仲包含好多意思，其中一個較有前瞻性嘅說法，就係Social Commerce。大眾可以將社交平台嘅每一個活動（如Like、Click、Review等等）變成一種新貨幣或實體金錢，金錢可以喺現實生活中使用。而用Social Dollar購物後，你嘅消費體驗亦會自動分享到自己嘅Wall之上，再一次同其他朋友互動賺錢，形成一個循環，再變成雪球效應。

　　早前Opel汽車推出一個Social Campaign “Pay with Views”。大眾拍片分上社交平台後，就可以透過片段所「賺」返嚟嘅View當作金錢買車。當時Opel 推出咗兩部車款，只要賺夠589,900 Views 或 922,800 Views，就可以買到其中一部車。Campaign一出推就引來無數人拍片賺Views，為賺取更多嘅Views，好多人都會不停為自己嘅短片作宣傳。Opel 此舉非常聰明，單靠兩部車就引來無數人幫佢作宣傳。除咗慳咗不少宣傳費之外，佢哋亦再次令人反思Social Commerce嘅可行性，極有可能成為未來一種新貨幣，重新為社交媒體定位。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好