【中國式新零售】大灣區無人店急增 智能零售「旺丁唔旺財」

　　電視成日講大灣區發展，多數只會提及一啲較為大嘅發展方向，例如「粵港澳互利合作」、「同城化」、「基礎設施建設」、「創業基地」等等，但就好少講「落地」嘅事情，好似同我哋呢班小小嘅marketer同中小企距離好遠，所以點樣落地先係重點。大灣區有11個城市，唔同城市都有自己嘅定位同發展進度，雖然定位上有啲area唔太清晰，各市城嘅定位之間亦會有重疊，但同樣嘅係，大灣區嘅城市係對外、對內嘅橋樑，將來呢啲城市都會步向一線城市之列，所以科技發展都必定係首要事項，由其係零售業。因為零售業係連接市民同中小企最直接嘅渠道，消費帶動零售，零售帶動就業同旅遊，為經濟製造動力。

　　近年中國經常提「新零售」，除咗要數碼化之外，仲要進行較大嘅integration，公司與公司之間、部門同部門之間、客戶同員工之間嘅integration，先能夠令生意進入第二個generation。但呢類嘅integration需要較長嘅時間開發同測試。喺第二個generation出現之前，而家國內零售業最明顯嘅變化，就係出現咗多好無人店同智能售賣機，有啲智能售賣機會獨立營運，有啲就寄居於無人店中，所以近年智能售賣機嘅數量上升得非常快。有數據指，現時中國大約有19萬部智能售賣機，估計4-5年後會多達150萬部。對比起中國13億人口 ，150萬只係小數目，大約800多人用一部機，需求仍有上升空間。好多marketer都會諗到，無人店同售賣機除咗可以擴展銷售點外，亦可以用嚟做廣告同收集數據，一舉三得，發展潛力好似相當高，但其實背後仲有好多pain point需要解決。

　　中國處於一個超高速發展期，部份地區市民嘅文化同生活水平十分唔協調，如果生活水平高，但文化水平追唔上的話，除咗產生好多差異之外，產品／服務未必一下子能夠接軌。另一方面，大眾習慣同店主有交流，畀錢、找錢、打價，都喜歡以真人對答。而近年消費者亦十分重視產品安全同質素，心底裏覺得睇實物先可以分辨真偽，智能零售未必滿足到佢哋呢方面嘅需要，所以好多無人店都係「旺丁唔旺財」。亦有報道指，中國售賣機至今已經收到9 萬多宗投訴，平均約兩部售賣機就會收到一宗投訴。基於以上原因，近期部份無人店開始結業。

　　大灣區嘅發展雖然出現咗好多機遇，但都係對大企為主，中小企、marketer、甚至乎小市民，仍需等待，或拓展對外引入嘅生意，方為上策。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好