難道旅行只為在Facebook上晒命……

　　去旅行唔記得帶passport，當然出唔到門。但今時今日，去旅行唔記得帶手提電話，嚴重程度其實同冇帶passport不相伯仲。用app查詢當地天氣、買景點入場門票、了解當地文化背景、途中更改機票，甚至充當翻譯，總之一機在手，通通都可以幫你做到。但有一個功能應該係大家不知不覺地經常使用，就係旅行期間喺社交媒體上「晒命」。最近睇到一個關於去旅行嘅調查，可以畀大家參考下現今趨勢。

　　調查包括9,000個受訪者，來自30個不同國家。調查顯示，有1/3嘅受訪者喺旅行嘅時候，每日會花超過4小時用手機，當中最經常做嘅動作包括上載相片 (60%)、喺旅遊景點打卡 (39%) 同定期監察住自己嘅post有幾多人Like同comment (32%)，刷一下存在感。有28%嘅受訪者表示，如果去旅行嘅時候唔准用手機，將會大大減低去旅行嘅樂趣。而有較多受訪者覺得手機冇電 (15%) 其實慘過同伴侶喺旅遊期間嗌交 (8%)。有14%嘅受訪者話，如果要佢揀，佢會想淨係同部手機去旅行多過同自己嘅伴侶去旅行。對佢哋嚟講，手機已經係佢哋最好嘅旅伴，好到連伴侶都可以唔要。

　　作為一個marketer，從以上調查你會知道手機已經「主宰」住大眾去旅行嘅心態同習慣。除咗一眾旅遊有關行業需要進入手機平台之外，你亦要意識到去旅行其實係一眾用家更活躍於社交平台嘅時候，佢哋會更主動製造有趣內容，更渴望喺社交平台上獲得關注。如果能夠好好捕捉呢一股心態，利用旅行晒命文化製造更多user generated content (UGC)，或許會係一個唔錯嘅campaign。

　　不過呢個調查亦令我諗起一個故事。有一次，一個難得來港嘅外國歌手開演唱會，我同一個朋友有幸坐喺第一行。演唱會中段握手環節，歌手走到觀眾席前一路唱，一路同大家握手。我哋當時都非常興奮，但我身邊嘅朋友就一路只顧用手機對準歌手拍片，就算歌手行到佢面前同佢握手，我朋友都只係透過手機屏幕同佢對望。現今嘅手機雖然已經進化到有雙鏡頭、有大機級數嘅景深，但作為一個喜歡去旅行嘅人，我始終覺得用雙眼去望呢個世界會來得更真實、更深刻。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

樂本健【年度感謝祭】維柏健及natural Factors全線2件7折► 了解詳情