品味即刻唔同哂！Dyson吸塵機如何成為生活品味的代名詞？

　　以前公司annual dinner嘅抽獎環節，最多人想得到嘅獎品必定係iPhone，其次就係現金獎或者旅遊券等等。但近年生態開始有啲變化，大家再唔會因為抽中iPhone而尖叫，反而大家會為抽中一部吸塵機或者風筒而喝采。論價錢，最新款吸塵機嘅價錢可以媲美最新嘅iPhone，但如果論價值的話，又係另一回事。

　　多數人抽獎嘅心態，都係想追求一啲「額外而實用」嘅東西，心態上禮物嘅「額外」價值遠超「實用」價值。意思係，抽中嘅禮物其實都係意外收獲，可有可無，多數係一啲你好想買又唔捨得買嘅東西，唔一定要擁有，但有咗會開心啲，而高級吸塵機呢類型嘅電器就正正切合大家嘅「需要」。

　　雖然吸塵機或風筒唔似 iPhone 可以無時無刻拎出嚟玩，佢亦唔可以轉 wallpaper 或者換手機殼去表達你嘅品味，但對某啲目標客群嚟講，「買或擁有Dyson吸塵機」呢個行為就已經係一種生活品味。絕對唔係要否定該吸塵機或風筒嘅實用性、產品質素等等嘅事情，個人覺得佢哋嘅吸塵機的確係好用，而且佢哋有咁多捧場客，質素一定有保証。但從marketing嘅角度睇，佢哋嘅出現無疑地帶起咗一個潮流，將呢件事變成咗一種時尚。明白到高級吸塵機對大多數人嚟講未必係一件必需品，所以佢哋嘅市場相對比平價吸塵機細，如果用一貫嘅方法去宣傳產品，未必可以係市場上分一杯羹。

　　對大眾而言，吸塵機或風筒只係一件生活家電，絕少有高低之分，除非你係一位髮型師，或者你對吹頭好有心得，如果唔係好少會接觸到一個幾千蚊嘅風筒，亦因為呢類型產品嘅市場太獨特，就算有其他出名嘅風筒基本上你都未必會知，而呢個咁市場獨特性已經係一種價值。另外，如果要同平價吸塵機或風筒比較，功能上要比到顧客「實用價值」已經係必然嘅事，另外仲要搵出市場上冇嘅賣點先可以突圍而出，而Dyson就選擇咗用「品味」作為切入點。喺呢個潮流未出現之前，相信好少人會覺得買吸塵機都係一種生活品味、用吸塵機係一種態度。而佢哋將賣一件產品變成賣一種品味，用家或買家從而為自己升格，如果你同朋友講你有部Dyson吸塵機或風筒，朋友同你嘅格調即刻唔同哂。其實呢類型嘅產品用「品味」作賣點主攻大眾化市場較為少見，所以佢哋一採用呢個策略時，就好易differentiate 倒自己嘅定位，將一種「生活需要」升華變成一種「心理需要」，就係Dyson 其中一個Core Value，而呢一個Core Value同時間亦打開咗家庭名牌嘅門路。

　　早年都有類似嘅案倒，就係「去硬皮機」。當然，去硬皮機同吸塵機嘅市場定位、定價等等都好唔一樣，但大家用嘅marketing策略有少少相似，而相比吸塵機，去硬皮機嘅市場更為獨特。去硬皮機除咗有普通版之外，仲推出咗特別版同Hello Kitty版，而Hello Kitty版嘅定價比普通版為貴，但因為用咗卡通人物嘅關係，positioning就唔同咗，同時因為價錢冇咁貴，唔能夠好似Dyson咁將「品味」推向極致。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】恒指在2024年先跌後升，你點睇2025年港股走勢？► 立即投票