成功必備的職場地圖：升Manager要幾年？

　　除咗打8號風球之外，第二個打工仔最期待嘅日子必定係Annual appraisal，等咗成年就係希望今年老細同你講你有得升職加薪。但老細又點會咁順攤呀～ 要有把握地同老細「講數」，一定先要了解一下自己有幾多「籌碼」，而好多人覺得自己最有用嘅籌碼就係年資。

 

　　其實好多同事、讀者都問過我呢個問題「marketing assistant (MA)/ marketing executive (ME)/ marketing manager (MM) 嘅職能有乜分別？要幾多年先可以由MA升到MM？」，呢兩個問題其實OK難答。

 

　　Marketing呢行不同職級工作、年資嘅分別，都受好多不同因素影響，公司架構、工作模式、老細作風、個人際遇等，好難一概而論。雖然話冇一個絕對嘅準則，但大部份人嘅平均值都會有參考作用嘅～

 

 

　　談論升職，通常會以兩個角度去評核員工，「工作」同「管理」。以MA/ ME為例，兩者嘅職能同工作其實分別不大，工作「量多質少」，多數零碎，除咗管理「自己」之外就冇乜「管理」成份可言。

 

　　所以如果你想由MA升上ME，review 時你同老細講你做咗幾多個project/ proposal 係冇人會理你，因為老細會覺得呢啲係basic requirement，而且你做嘅task多數唔係好大件，所以做得好係你應份嘅事，並唔係升職嘅籌碼。

 

　　所以除「工作」表現以外，你嘅自處能力有幾強先係最重要，要擺脫俾人有freshmen嘅感覺，唔好俾人覺得你「日日都係新同事」或者「日日都要人幫」，呢個先係阿頭升職嘅首要考慮因素。

 

（晉升年資： 快則半年，慢則2年）

 

　　之後ME> SME> AM其實差無幾，工作量一定會增加，難度亦會提高，唔計有啲係因為公司要留人而被升職，大多數SME/AM 分兩種。第一種員工佢哋「打得唔管得」，所以公司好多奇難雜症嘅工作都會交俾佢哋，或者佢哋能夠一個人做倒三個人嘅工作量，不過呢類人就「唔管得」，一要管人就頭痕。而另一種員工唔係「好打得」，但就「好管得」，佢一個人頂多做倒一個人嘅事情，但你俾兩個人佢管，係佢指揮之下可以完成倒十個人嘅工作，當然冇話邊類好啲、要學習做邊類啦。比喻成一支球隊，費格遜教練未必踢波好叻，但管理球隊有一手；碧咸踢波好耍家，但講管理又未必勁得過費格遜。而由ME到AM 呢一個階段，一定要了解／打造自己係邊一類人，咁下次review 時你就知用乜野籌碼同老細傾，同時自己長線發展亦可以定下目標。

 

（晉升年資：「ME>SME」大約2年，「SME>AM」大約2-3年）

 

　　由AM升manager係一個都幾大嘅關口，同之前幾個職級比較，manager係一team/ department嘅代表、發言人，對組外嘅「人」同「事」都闊咗，管理組內嘅事情多咗，全組人跟你搵食，只要你開罪咗一個客，或者同隔離team有牙齒印，之後成team人要一齊陪你捱。

 

　　Manager每個決定都會影響成組嘅生死，所以老細要升人做manager會比較揀擇。而做得manager都assume你「好打得」，所以升職重點主要放咗係人際手腕同管理能力。再之後由manager到director會開始比較難評論，多數都比較講際遇（我覺得），亦好多時要等樓上有人辭職你先「有機會」升上director，所以你會見啲同事等得耐冇得升就走人，從而得知「了解」同「安排」際遇長遠係好重要～

 

（晉升年資：「AM>Manager」大約1-4年）

 

　　睇完之後你可能會回我一句「我公司全個department 都係得我一個，咁點計先～」，雖然呢個係香港好多公司嘅寫照，但唔好忘記，終有一日你都會轉去大公司，而以上嘅guideline 就係你開搌新一頁嘅地圖。

 

　　準備好自己嘅職場「地圖」，免得十年後先至問路。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情