【風水求財篇】豬年經濟沉寂、鼠年財星給力？

　　先講發達星。

 

　　2020年財星在西北，如果你家大門、睡房門、床頭、或公司的大門、辦公室房門、自己的座位是在西北，都可以接住條水喉！

 

　　去年財星在屋的中央，本欄已預告「財入中宮，但同時有財困。」豬年吉氣在中，即人人有份，當時我都估無咁好死架咧，人人有，即是分不到幾多啦。後來政府派了不少糖，但都是糖霜而已。最不幸是財星入囚，因此入少少，出多多。結果黃藍對決，社會流血。

 

　　2019年可謂香港勁黑的年份，從六月開始，未曾好過，不少人破財、失業，公司關門，想Start Up，結果Close Up！豬年不只錢關起來，人也關起來，不能外出，人不流通，財怎流通呢？

 

　　鼠年財運希望正常啲，大利西北。

 

　　催財方面，不同門派各師各法，有用八粒珠的鐘轉動財氣，也有用清水來催動吉氣的。兩種都各有靈驗的先例，個人所見，「水力發電」堅啲，但亦煩啲——水要換，泵會壞，動水器又有脾氣，鍾意就罷工！若用水切記要用活水，即流動的水，否則會滋生蚊蟲，產生臭氣，趕走財氣，結果求財不成反破財。

 

　　又財位要執拾乾淨，讓財氣流通，否則好磁場駕到時，還要參加障礙賽，怎會順利留低呢？而且此位置要光光亮亮，若此位太暗，可考慮加燈，以增力度。

 

　　但水可載舟，也能覆舟，若西北不巧剛是你屋中的凶位，再置動水，人會病。因此你布了個水陣，兩周之內若屋中有人無啦啦病倒，你就要撤陣了。

 

　　現在是八運（2004→2023），八白是現任財星，鼠年坐鎮西北。未來的財星是九紫，九運由2024至2043，鼠年飛到正西。想財運升呢，當然要左右逢源，兩粒吉星都招呼啦。而且九紫本身是喜慶星，代表升級加薪，得獎或獲嘉許等；同時亦與婚嫁添丁等掛勾。得此星加持者，一個唔覺意可以「財色兼收」，拉埋天窗，兼財運亨通。

 

　　要催旺也有二法：一是在此位供九朵水養鮮花，顏色要鮮艷，如紅、粉紅、紫、粉紫、橙、粉橙等，但此法有點進取，如果正西剛巧是府上五黃位所在，屋主可能病到五顏六色，與艷卉的蛇紫嫣紅配成彩虹系列！保守點的可插一朵紅花，風險沒有那麼洶湧。

 

　　下期談桃花和凶煞的位置，Stay Tuned！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇