【準備要趁早】2019年開工大吉全攻略

　　你可能正準備緊聖誕戰衣，一心孔雀開屏、靚絕全城。你同時亦可能策劃緊春節享樂大計，為春節外遊駛錢同假後開工搵錢打算。

 

 

開工

 

　　明年開工吉日會令零售業老闆笑逐顏開，因為係年初一，零浪費、全攻略！

 

　　若根據己亥年立春八字用神為金水嘅前設（另文解構），則年初一癸酉日，一柱水金，以金生水，生旺立春八字日主嘅壬水，真係fit到漏金。

 

　　吉時有大把選擇，由下午3:30至晚上11:00，任揀唔嬲。開舖最好搵定熟客幫襯，開單收水，或者唔駛貴客移駕實體商店，電子支付就掂晒！

 

　　不過年初一仲放緊假喎。寫字樓點算？

 

　　嘿！又有蹺。

 

　　搵個員工捱義氣，重賞一日額外假期，包保佢條氣順晒。年初一佢可以揀一個方便嘅時辰，番公司打個白鴿轉，開晒所有人嘅電腦，如果因私隱或公司秘密問題（或者其他員工唔想你發現佢地上網淘寶或賭波），就開自己個電腦，通發電郵，祝佢地開工大吉、全年順利，同時以新嘅黃色毛巾用濕水抹寫字枱同房門框，如果係幾十至幾百人嘅公司，當然發電郵算啦，佢做人肉招財貓啫，唔係人肉抹枱機嘛。

 

　　不過世界上可能有四分之一人係不宜用金水嘅，因為冬天出生嘅人多用木火，咁就要揀年初二開工咧，甲戌日，甲為壯木、戌為火庫，應該夠彈藥畀你用嘅。如果你唔想特登番公司，可以照樣年初四上班，不過要揀甲午時，即11:30到1:00，你準時九點報到都得嘅，同D同事吹吓水先，到吉時先開電腦，抹寫字枱、發開工電郵等就得咧。

 

　　其餘於春夏秋出世嘅人類，年初四就用辰時，辰為水庫，希望全年有水，可以早上8:30到公司，趕吉時、扮勤力。

 

開年

 

　　初八（2月12日星期二）下午5:30至11:00。若嫌太遲可以年初一開埋年。（用木火嘅人年初二，可以開工兼開年）

 

團年

 

　　農曆十二月廿四（新曆1月29日星期二）中午11:30至3:00。

 

　　大掃除：農曆十二月廿五（新曆1月30日星期三）早上7:30至11:00。

 

　　去舊迎新，祝你人生豐盛繽紛！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》心理急救II：幾個徵兆辨認身邊人需要心理支援！點樣對情緒進行急救、自我照顧？專家分享穩定情緒小練習► 即睇