不用陰間使者出面！靠「調解員」擺平陰陽界糾紛

　　農曆七月，有稱鬼月，寫返篇人鬼溝通應下景。

 

　　時興調解，舉凡財務糾紛、法律訴訟，有時都可以用mediation解決，估唔到傳說中輪迴之後嘅糾結，一樣可以由「調解員」擺平。

 

 

　　為這傳說添點人間feel的，就是她。

 

　　時空並非遠古的荒山，而是人來人往的香港地鐵！

 

　　朋友和她並肩而行，發覺她怎麼在人潮中，有時S字型行，有時Z字型行，好似條魚游緊水咁。

 

　　「喂，你點解咁行嘅？咁有型嘅！」朋友問。

 

　　「避人吖嘛！」她答

 

　　「冇人噃。」

 

　　「唏，你睇唔到啫！」

 

　　她就是俗稱有「陰陽眼」的異類，有這特異功能的人，會看到靈體在我們周圍出現。

 

　　我朋友係IT人，當然覺得這匪夷所思。

 

　　「咁咪好得人驚。」他問。

 

　　「冇事吖！其實喺我哋呢個空間，仲有另一個dimension，靈界就喺嗰度活動，本來大家相安無事，河水不犯井水，但若有隔世恩仇，嗰啲憤怒、怨恨、悲傷意識特別強嘅靈體，就跨界嚟追究，甚至追殺，情況可以好慘烈！」

 

　　原來她在一道堂做義工，由於有陰陽眼，常幫助來求救嘅人，這些人不是遇到了極倒霉嘅事，就是身體嚴重不適。

 

　　「我舉個例子說明啦。有位高大威猛嘅、相貌堂堂嘅男子上嚟，話佢條頸成日好痛，屢醫不癒，我睇到佢有好多靈體跟住，就問佢哋，原來全部係被呢個男人上幾世做將軍時斬咗頭嘅，所以佢哋要以牙還牙，日日打佢條頸，等佢冇時安寧。」

 

　　「咁點解決呢？」

 

　　「呢單係我罕有搞唔掂嘅case，平時當事人sa下冧、道下歉、念下經、做下法事，就可以搞掂。但係嗰次，原吿太多，佢哋自己都講唔掂數。我諗個過氣將軍有排痛，有一日佢陽氣衰退，仲會被圍剿！而且，應該還一世都未夠數。」

 

　　唉！有權力就有業力，掌權者有時都要諗下，有啲嘢還唔還得起？要還幾多世？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情