做打工皇帝要乜條件？

　　呢種幽默感，唔係人人頂得住。

 

　　清明節前，朋友趕住出嚟同我食飯，秘書一路追住報告公司事務，朋友就充耳不聞，繼續世運短跑，仲掟低一句：

 

　　「有乜事，留番拜山先講啦！哈哈哈。」

 

　　我呢位朋友，係跨國大集團一員猛將，乃上市公司CEO，三千人之上，一人之下，年薪加package達八位數字。

 

 

　　論相，佢眼神鋒芒盡露，眼仔精精，即個腦轉數好快，兼好擅長商界表演，眉短而有勢，即決斷迅速、講求效率；皮膚雖然睇得出不屑保養，但都算細緻光滑，即係有貴人賞識，兼觀察入微，佢要冧你，易如反掌，佢要疾你，亦唔駛擇日。

 

　　呢種組合，有靈活性、準確性，但冇乜耐性。佢自爆：

 

　　「啱啱去大陸開會，我嗰度嘅頭頭準備咗二百零八頁嘅powerpoint。我同佢講，如果我要睇咁多字，我就去睇「戰爭與和平」啦！跟住定下規矩，以後書面報告祇可一張A4紙，powerpoint就八頁啦，」

 

　　D下屬present好多data，分析完再分析，好多時都冇結論，朋友嘅強項，就係消化完D資料，會再用直覺嚟決定，至今為止，未衰過。佢仲收放自如，警覺性奇高。

 

　　「其實喺大公司揸弗，除保持業績有平穩增長之外，仲要有獵鷹嘅銳利，一年有兩三次亮麗嘅動作、精采嘅表演。更重要嘅，係要有聞到(火羅)味嘅觸角，我有一次好快咁研究一單case，總覺得有D唔妥，下屬話冇問題喎，我叫佢地check清楚，結果真係有地雷。」

 

　　你唔好以為佢咁揮灑自如，一定幾hea。原來佢真係人肉機械人，公幹時，一定搭夜機，剛扣好安全帶，立即睡著，不吃不喝，抵埗即開會。午餐唔駛搵地道珍味，全人類啃三文治開會。會後佢照例搭夜機，凌晨五時抵港，喺機場貴賓室沖個涼，八時正坐喺公司。佢每年一定幫公司慳番好多酒店餐飲應酬費，抵請！

 

　　有幾多人有咁嘅魄力同洞察力？所以，咪以為老細腦細，實則唔易做打工皇帝！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票