揀老細

　　無論揀份工，或者揀老公，都要小心一D涼薄嘅相，以免上班激親，或者抱撼終身。

 

 

　　先來一個與眾不同嘅笑話，睇完先揭曉如何不同。

 

　　返工前。

 

　　腦細：非常歡迎！

 

　　職員：太多嘢做，我會唔撈㗎。

 

　　腦細：你放心，喺我管理之下係冇可能發生嘅。

 

　　職員：我星期六星期日有得休息嗎？

 

　　腦細：唔使講啦，基本嘢嚟喎。

 

　　職員：平時會唔會成日ＯＴ，甚至通頂㗎？

 

　　腦細：無可能嘅！

 

　　職員：有交通費、餐費津貼嗎？

 

　　腦細：當然有啦，一定比同行高。

 

　　職員：會唔會有做工猝死風險㗎？

 

　　腦細：唔會。你點會咁諗嘅？

 

　　職員：公司會定期搞旅遊獎賞吓員工嗎？

 

　　腦細：呢個有明文規定嘅。

 

　　職員：咁我要準時返工嗎？有D公司遲到會扣錢喎。

 

　　腦細：唔會，睇情形啦。

 

　　職員：人工呢？出糧會唔會準時？

 

　　腦細：百分之一百。

 

　　職員：會唔會新嚟新豬肉，所有棘手工作都由新丁做㗎？

 

　　腦細：冇可能嘅，公司仲有唔少資深同事。

 

　　職員：如果上層有空缺，會考慮提拔新人嗎？

 

　　腦細：唔駛問啦，呢個係我地公司嘅成功秘訣。

 

　　職員：你唔會呃我卦？

 

　　返工後。

 

　　請由後面讀返上去。古時對聯有捲簾格的風雅，現代閱讀世界，好多時要逆流而上，才接近真相！

 

　　在相學而言，乜嘢特徵表示呢個人無口齒、搵人笨呢？

 

　　一字寄之曰尖！

 

　　舉凡眼尖、耳尖、咀尖的人都比較難纏，而其中尤以鼻尖鼻削和上唇超薄兼起尖啄者最難頂，前者要求最高，付出最少；後者語言刻薄、噏得就噏。

 

　　有時就算千揀萬揀，老闆或老公都可以貨不對板。幸好社會自由開放，唔啱咀型、唔啱心水，可以劈砲換畫，改埋手機冧把！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》說說心理急救：遇危急事故應如何面對？點樣正確提供情緒支援？講錯說話容易造成二次傷害！► 即睇