2016-02-04
二黑入中宮 人人有小麻煩 西南有財 東方有喜
風水這回事,若有高手指點,肯定有料到。去年我公司有兩位同事同時有喜,風水專家早說有吉星照臨,當時以為有新生意,後來才知是對香港人口有貢獻!幸好,公司盈利也有進益。我與朋友戲言:若有人恨添丁恨到發燒,可以請佢上嚟吸吓D喜氣。免費醒佢!
若論猴年的九紫喜慶位,就在正東。坐這方位、睡這方位、或大門、睡房在東者,都有好消息,例如升職、勁加薪、添丁、結婚……等。這位置可放紫晶或紅晶,靚色旺靚位。但不要揀三尖八角的,篤眼篤鼻篤自己!
不過今年人人都要領少少嘢,因為二黑入中宮,二黑是病符,婦女尤易中招,所以今年中老年女性要特別注意身體健康。由於病符在中,除非你間屋有幾千呎,可以避咗中間唔去,否則好難倖免。補救方法是,在屋中央放一塊銅片,上置金色(千萬不要放黃色或紅色)地氈,蓋住冇人知,亦可提醒你不要走過去這二黑位。
二黑是小病符,勁病符五黃在東北,此位宜靜不宜動,朋輩中試過五黃到門口,剛巧要換鐵閘,結果遇到車禍,做咗三個月鐵拐李。另一人則以為加口釘冇事啩,亦攪到腸胃痛,所以五黃位幾大都盡量唔好郁,否則後果自負,又若五黃到門口、無論是大門或房門,切忌在門前舖張紅地氈、貼張大紅揮春、或吊串紅炮竹,甚至連紅花都唔擺得。你要營造過年氣氛,可用金色飾物。補救方法是放安忍水在門後,嫌麻煩放個勁大銅錢亦可。
另一不宜動的位置是西北,乃是非位,若動了,小則有口舌、大則有官非。救應之法,係放件銅製裝飾或擺設,唔係銅色,係真銅喎!
八白財星在西南,最好放定張椅喺度,一有時間就去吸吓財氣。不過今年催財有難度,因此位同時有太歲到臨,宜靜不宜動,所以都係用人肉催財法,自己出動啦!
桃花位在東南,想增強桃花運、或事業上異性助力者,可放紫晶或粉紅晶,揀圓渾柔美的為上。
今年全人類(當然有少少例外嘅)財運都麻麻地,不如多結善緣,希望這廣義的桃花,栽在今年、開在明年,至少花香滿室、高朋滿座,自我感覺較良好之餘,凡事都順風順水D吖,大家一於以良好意願改良客觀風水!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票