叛逆與溫柔

　　他出現時，沒有我想像中那麼edgy，看來斯斯文文的，但隱約帶點青澀的江湖氣，有些像得獎微電影《專業分手員》的男主角，有點內歛、有點奔放。

 

《專業分手員》片段截圖

 

　　早前我打電話約他來見工，旨在預先了解一下他的性格，收線前我簡單地形容一下公司位置:

 

　　「我哋隔Sogo兩條街，離佔領地區不遠。」

 

　　然後我直覺地問:

 

　　「你係咪瞓緊街?」

 

　　「而家唔係，一陣去瞓。」

 

　　Interview當日，不知為甚麼又談起佔中。

 

　　「為咗呢件事，我同阿媽開片開咗一個月!」

 

　　「吓!係邊個片邊個?」我問。

 

　　「嘿!最初互片，後來係佢鏟我!」

 

　　「好在唔係你鏟佢。你應該幾錫屋企人嘅。」

 

　　「係呀!你點知?」

 

　　「鼻頭有肉，家庭和睦嘛，係我自己作嘅，其實你心裏面好關心阿媽。」

 

　　「又係喎!我讀緊書嗰陣，因為見到阿媽捱得好辛苦，我一上完堂就去賣電訊package。呢!就係你附近嘅鵝頸橋囉!D阿嬸係度博命打小人，我就博命sell套餐。」

 

　　「不過你心軟口硬，因為有兔仔牙，所以會我行我素，唔鍾意俾人管，亦冇人管到你。」

 

　　「係呀!我都知道自己任性嘅，不過我現在仲有時間本錢，所以會試吓不同行業，搵到自己做得開心為止。」兔仔牙說。

 

　　有人認為兔仔牙很性感，尤其是在美女面上。

 

　　但這特徵反映某程度的反叛，通常是輕度反叛而已。

 

　　你唔踩佢，佢唔咬你。

 

　　但加上其他攻擊性的面相特徵，則殺傷力升呢。若只是獨沽一味兔仔牙，通常只需留意兩點:

 

　　(1) 說話要小心，不要分分鐘率性而言，驚死表態唔夠早，這種快人快語的性格，無論在家庭或工作層面，都勁蝕章。

 

　　(2) 絕對不宜與in-laws同住，例如兔女郎若與翁姑同屋，死梗!因為自己父母會包容你，另一家人則無此優待，必然反枱收場!

 

　　再說這位兔仔牙先生，我終於沒有聘請他，因為我們客戶有一噸corporate　guidelines，兔仔牙天生反規範，一定拂袖而去。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》【親子溝通】怪獸家長原來都有呢啲通病！相處有一件事切忌？► 即睇