財爺星期三(24日)公布咗最新一份財政預算案，相信《經濟通》讀者最關心嘅就係上調股票印花稅，由0.1%加至0.13%。先行利益申報，Tina都係一位密密Trade嘅股民，加印花稅的確係打劫咗我荷包，一個月交1000蚊印花稅(只不過係成個月Trade 100萬股票)的話，我要畀多300蚊，當然係大力反對，但今次加稅0.03個百分點令廣大投資者反感之外，更可能掀起一場新嘅政治角力。

　　公布預算案之前，財爺算係收得相當密實，睇返資料，最早開聲撐加稅嘅有六人組嘅建測界謝偉銓，之後就到自由黨嘅鍾國斌、新民黨嘅葉劉淑儀，到最後仲無啦啦走埋個前財庫局局長馬時亨出嚟力撐。反對嘅當然就係直接受影響嘅金融服務界張華峰，民建聯亦都有出過聲唔贊成咁。

　　加稅當然係會有人贊成有人反對，但今次就加印花稅，有個特別之處，係要獨立上立法會開法案委員會，唔係同財政預算案一齊通過。同預算案一齊過，咁建制派夠膽撳個反對嘅相信少之又少，但單獨上立法會的話，就可能加添變數，「民意」隨時可以影響只剩下建制嘅投票意向。

　　香港炒股嘅人真係唔少，十之有九Tina估計都會反對政府加三成印花稅。而近年內地股民參與港股買賣嘅數目亦都增加唔少，成日聽到有幾多幾多北水流入，就知港股市場已經唔單單係港資外資主導。Tina上過內地嘅炒股論壇睇過，唔少試過A股加印花稅慘痛經歷嘅內地股民都鬧爆香港今次加稅，輿論可以話係一面倒咁「倒香港政府台」。

　　Tina同幾位對增加印花稅未表達好鮮明態度嘅建制議員傾過，佢地都認為，剛剛中聯辦主任夏寶龍講完「愛國者治港」嘅要求之後，建制派夠唔夠膽喺可以影響政府財政嘅法案上投下反對票，絕對係一個考驗。有人直言，除非有明確指示大家係可以自由意願咁去投，否則，無既定立場嘅一定會投贊成票，「到呢一刻睇愛國媒體嘅評論，無一出嚟對增加印花稅指手劃腳，我估計有足夠票數投反對嘅機會，係接近零。」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇