一場鬧劇、一場困局，最終喺中聯辦同埋港澳辦先後一錘定音、建制歸位之下，都係要「Endgame」。Tina執筆之時，立法會仲未喺內會進行最後直上大會嘅討論，但係以建制派人多勢眾，再加上北大人嘅硬指令，必然係會如政府所願，休會之前必定可以通過。條例接近通過，咁各位「學生」嘅成績表會點派法？

　　之前一直同Tina傾談嘅政界中人就重申，成條條例一開始的而且確係無阿爺插手，純係特首林鄭月娥同保安局局長李家超嘅計仔。本身係得到阿爺高度肯定，並且得到好高評價，幫阿爺解決一件廿年都未解決嘅難題；點知事件發生到最後有外國政府積極開聲干預，搞到阿爺要由枱底走到上枱面叫建制歸隊，可能會令到林鄭同李局長被扣分數；的確，林鄭如果一早同商界摸好底，事件會無咁肉酸，但係整體來講，林鄭面對反對派立場堅定、毫無退縮，唔拎滿分但仍然係有優良表現，李家超亦一樣獲得阿爺嘅肯定。

　　至於建制派方面，據聞阿爺對個別人士已經表示不滿，最明顯就係田二少田北辰，之前提出多項建議都係同中聯辦、港澳辦意見相違背，所以阿爺出聲之後田二少極速「深潛」，無再發表佢嘅大膽建議。自由黨就做開「壞孩子」，阿爺都預咗佢地有此一著，不過阿爺開聲之後極速歸隊，表現尚算合格，應該唔會有太大影響。

　　雖然就話逃犯條例係直上大會，但政府都唔係死牛一邊頸，郁都唔肯郁。據聞建制派陣營，特別係商界方面都準備喺遊戲規則容許之下提出修訂，主要係兩方面，都係涉及提高引渡門檻，包括干犯罪行刑期可以判處七年以上，同埋會要求由要求引渡當地嘅最高級法院提出請求，先有條件提出引渡。聽聞呢兩個修訂政府都已經默許可以獲得通過，估計兩大商黨自由黨同經民聯齊齊支持之下，將會成為最後版本。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】卓林普經優才計劃成為香港居民，桌總冀當局放寬16歲以下青少年進入桌球室限制助年輕人接觸桌球，你是否認同？► 立即投票