特首選舉由熱身賽，幾位參選人都準備企喺起跑器上面；因為下周2月14日情人節當日，就正式開始進入提名期，1194位選委，都要諗一諗開名提名畀邊一位候選人。

　　咁多位候選人，相信讀者最關心嘅就係曾俊華究竟入唔入到閘。

　　Tina之前嘅估計，曾俊華應該唔難入到閘，憑佢做財政司司長多年，對商界、金融界嘅熟悉，要拎呢兩個界別六七十票，再加非建制七八十票，應該唔難，不過今時今日，Tina都真係要修正我嘅估計，又或者係話，修正之前對阿爺喺今次選舉影響力嘅低估。

金融界共54票料盡歸林鄭

　　Tina八到嘅消息，同金融最有關係嘅三大界別，即係銀行嘅金融界、證券嘅金融服務界，以及保險界，每界別18張選委票共54張飛，可以話盡歸林鄭手中。金融界據聞會以東亞銀行(00023)李民橋做代表，為林鄭獻上大部分選委嘅提名票；金融服務界就分別由2012年立法會選舉曾經明爭暗鬥嘅現任立法會議員張華峰，以及現任港交所(00388)董事李君豪分別做代表遞上提名票，但都係全投林鄭。

　　Tina收風，中聯辦對於金融相關界別選委係非常著緊，過去一個月不斷打出「追魂Call」，一定要箍實呢班選委。幕後嘅判斷，前財爺做咗咁耐財金官員，如果金融財經界都一票不投曾俊華，對佢嘅打擊自然係最大。所以中聯辦經濟部壓力亦都非常大，務求一票不漏畀晒林鄭，成為打擊曾俊華參選嘅最大武器。

　　噚日曾俊華走去拜會多個政黨，其中見自由黨時有記者問佢驚唔驚唔夠票入閘，佢笑住話「好驚、好驚、好驚」，相信佢最驚嘅就係，商界同金融相關界別得小貓三四隻支持，咁又點可以扭轉到依家嘅劣勢呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票