2021-07-06
14萬人夫開群組「控訴」老婆迷MIRROR 姜濤致歉︰我對唔住佢哋
【晴報專訊】有網民前日於FB開設「我老婆嫁咗比MIRROR導致婚姻破裂關注組」專頁,截至昨晚九時,已累積逾14萬人加入,大量男網民留言及po相「出賣」老婆如何追捧鏡仔變「花痴」,MIRROR人氣王姜濤(姜B)昨日試圖降溫︰「老公們聽下我哋嘅歌,可能會鍾意我哋!」未知一班苦主是否收貨。
近年本地最強偶像組合MIRROR迷倒萬千少女,亦勁吸不少人妻「鏡粉」。前日,有男網民在FB開群組,控訴老婆成為「鏡嫂」後做出各種瘋狂行為。群組所見,討論度最高的是姜濤、陳卓賢(Ian)、盧瀚霆(Anson Lo)等,群組不足兩日已有超過14萬人加入,連鏡仔經理人黃慧君(花姐)亦有入谷。最搞笑是有人夫網友發帖,表示在老婆生日時,送上1:1半裸Ian人形攬枕冧妻,震撼程度不遜於多年前宅男最愛的周秀娜攬枕,該男網友無奈留言︰「你哋夠我激?我瞓喺個男人隔籬。」有老公亦分享「慘況」,指太太以姜B歌曲《愛情簽證申請》的超大海報製成客廳牆紙。他寫道︰「我間屋搞成咁,有無師兄明我感受?」
姜B大型牆紙照片昨日在群組瘋狂洗版。(FB圖片)
有男網民無奈表示每晚有Ian攬枕「陪瞓」。(FB圖片)
Jer戲言睇完得啖笑
Jer與姜B面對「鏡嫂的愛」,明顯受寵若驚。
群組中,有大膽男網友上載鏡仔與女友的合照抽水︰「人哋有女朋友㗎喇,你哋班女人醒未?」有鏡嫂亦上載僅29個月大的女兒清唱姜B《蒙著嘴說愛你》,直指女兒是全港最細姜糖。對於群組瘋狂洗版,昨日柳應廷(Jer)與姜B現身拉闊音樂會記招時表示有留意,Jer笑稱︰「個group其實有搞笑成分,並非太真實,茶餘飯後睇下都開心!」姜B笑言得知有自己肖像的牆紙,更說︰「我覺得幾靚!我都無(呢款牆紙),想問邊度攞!」提到他令很多人夫在網上呻婚姻破裂,姜B認真道︰「如果影響到人哋夫妻關係,唔好意思,我對唔住佢哋!」他又硬銷MIRROR︰「我希望老公都聽下我哋嘅歌,可能都會鍾意我哋,12個人有唔同感覺!」
姜B驚著泳褲現身
談到有男網民聲稱被太太要求將消費券全用作買MIRROR產品,姜B表示︰「每個人有經濟自由,希望粉絲唔好迫自己老公!」Jer亦說︰「男士都有自己鍾意嘅嘢,鍾意買乜就買乜!」另一方面,ViuTV本月推出新節目《夏日有團伙》系列,找來MIRROR、ERROR及鄧麗欣等參與各類運動,有傳MIRROR成員要穿泳褲亮相,曾是大肥仔的姜B聞言尷尬稱︰「我哋要著泳褲?我怕著咗出嚟公司會要求同我解約!(你有『士啤軚』?)都有㗎。」身旁的花姐忽然插嘴︰「唔記得同你講,唔止著泳褲,仲要係白色!」嚇得姜B勁緊張,其後他強調穿平腳泳褲或潛水衣就可以。Jer亦附和道︰「我都介意,不嬲都保守,唔似Stanley(邱士縉)咁成日露手臂!」
轉載自: 晴報
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票