新任嫲嫲唱《皆大歡喜》氹孫 薛家燕︰抱到唔捨得放手

　　【晴報專訊】薛家燕升呢做嫲嫲，首名內孫於上周三（26日）出世，家燕姐昨日陪兒子石耀庭在醫院會見傳媒，家燕姐提起孫仔即眉飛色舞，完全被孫仔溶化，又大爆孫仔跟她一樣有迷人酒凹。

 

薛家燕抱住孫仔開心到四萬咁口。（FB圖片）

 

　　現年71歲的薛家燕終於如願抱孫，新抱陳素怡（Zoe）一索得男，誕下重七磅半的男B，英文名Julian。家燕姐昨日形容孫仔是一名「大隻仔」︰「新抱今次係剖腹生BB，之前一晚我又興奮又緊張，完全瞓唔着，依家平安出世，我成個人安樂晒。孫仔好大隻，個樣似爸爸，酒凹就似我，同埋佢喊聲好大，嘈醒其他BB。」新任爸爸石耀庭則透露囝囝英文名較斯文，希望囝囝將來會乖巧一點。

 

薛家燕與兒子石耀庭會見傳媒，分享榮升嫲嫲及爸爸的感受。

 

讚B仔一抱就唔喊

 

石耀庭與太太陳素怡及囝囝Julian組成三口之家。（FB圖片）

 

　　家燕姐表示孫仔十分健康，食得瞓得，又指孫仔喊時一抱起他便不會哭。家燕姐笑謂︰「個孫好似認得我咁，醫生話佢扭抱，佢哋叫我唔使抱咁耐，但我點捨得放手呢！佢哋話驚我攰，我話咪畀我抱下囉！」囝囝石耀庭踢爆家燕姐唱《皆大歡喜》給孫仔聽，家燕姐哈哈笑說︰「我唱『唏呀唏呀唏』，佢就擘大眼望住我，佢好識氹我開心。」問家燕可有幫手餵奶？她笑說︰「新抱餵母乳，所以我餵唔到，但有請24小時陪月幫手。」

 

新城電台眾DJ及高層送果籃祝賀薛家燕。（FB圖片）

 

　　另外，家燕姐預告整個六月會停工幫手湊孫，又準備薑醋派給親朋好友︰「我計過要準備200幾至300份，係自己品牌推出嘅薑醋，所以嚟緊真係有啲忙。」她又感謝新城電台同事及高層送給孫仔的禮物及果籃。

 

轉載自: 晴報

• 

【你點睇】陳美寶、羅淑佩分別被任命為運物局及文體旅局局長，你是否認同新任命有助香港鞏固物流樞紐地位及促進旅遊經濟？► 立即投票