2016-01-05
貼錢做姊妹 縮骨新人被數臭 (晴報)
新人擺酒開支大,惟招待賓客「度縮」很易招話柄。有網民數算遇過最寒酸的新人,包括要姊妹自費買裙;姊妹利市僅20蚊,更有人要賓客籌款抽獎。婚禮統籌指婚宴物資應由新人支付,要親友額外捐錢有失大體。
最近有調查指,今年新人結婚平均開支達三十一萬元。結婚開支龐大,但向出手相助的兄弟姊妹及賞面出席賓客「開刀」,卻令人反感。有網民以「見過最寒酸嘅新人」為題,指同事請她幫忙做姊妹,但買裙及遊戲道具都要姊妹墊支,新人給姊妹的兩封利市竟是十元。「問佢攞番(買裙)錢,竟然反問我哋有無單,好似我哋夾埋呃佢咁」,婚禮後雙方更反面。
姊妹呻「女皇使盡妹仔」
不少網民對此和應,有人說曾有新娘要求指定款式的姊妹鞋,要姊妹自掏腰包裝身,結果部分人無set頭兼素顏上陣,非常嚇人。亦有賓客抵達酒樓即被「打劫」,要夾錢玩抽獎遊戲,被譏諷連遊戲成本也轉嫁在賓客身上。
One and Only婚禮統籌師譚海祥表示,兄弟姊妹的不滿,大多與金錢有關。「譬如開會食飯,人均消費百多元要AA制;新人無包姊妹裙、兄弟煲呔及化粧整頭等,要他們出錢又出力!」他憶述,曾有姊妹好心代新娘取晚裝,途中不慎弄污衣服,店舖要賠償三千元,新人亦要求該姊妹自付。
譚續指,兄弟姊妹義務幫忙,但部分新人「唔識做」,令他們有微言。「譬如婚宴十一、二點才完結,兄弟姊妹收拾物資後已近一時,新人無為他們call車,的士錢都無!」亦有新娘要姊妹捱餓拍攝外景,姊妹「直踩」五、六小時,忍不住說「女皇使盡妹仔」。
夾錢抽獎賓客易反感
香港專業婚禮統籌協會婚禮統籌總監譚凱恩指,早年夾錢抽現金獎的現象,近一年又再復現。「有新人拿著錢箱滿場飛,猶如籌款活動,甚至有spotlight照著賓客,有人銀包只有一張五百蚊,畀又唔係,唔畀又唔係,搞到場面尷尬。」她強調到場賓客已付人情,若要他們再夾錢有損體面,況且抽獎僅一兩個人獲獎,其他人多不願意集資。
轉載自: 晴報
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票