2019-08-06
同志們!嗰邊! Fact Check唔該!
話說噚日網民發起全港大罷工同埋舉行集會,但結果最後演變成示威同圍堵行動,警方為驅散示威者區區都催淚彈大放題,噚日單日之麻,已經射咗大約800枚喇!各位行家真係食彈食到飽!槍林彈雨片Jenny收唔少,但今朝就收到條片有位防暴阿Sir行動嗰時用普通話大叫「同志們!」,Jenny當堂嚇一嚇,究竟發生咩事呢?
阿Sir叫聲:「同志們」 網民即時「巧京京」
講講條片先,入面見到有幾個防暴阿Sir想入大埔超級城,但職員就拒絕,雙方少不免有少少爭執啦!跟住阿Sir好似有啲嬲嬲,不過都冇出手,只係用警棍指住商場職員話,「唔係你歡唔歡迎,根據警隊條例我有權入嚟,而家我暫時唔入嚟!」咁另一個商場職員就即刻出現做和事佬!點知,呢個時候後面有個阿Sir向同僚以字正腔圓普通話叫咗聲:「同志們」,再以廣東話講:「嗰邊!」。
就係呢句,令唔少網民「巧京京」,跟住就傳出種種謠言,「唔通佢真身係公安?」、「唔怪得冇委任證」、「解放軍混入香港警察!」、「有大陸人趁亂冒警呀!」等等……一時間人心惶惶。
謠言滿天飛 警務處嚴正澄清
Jenny一向本住求真精神,所以問咗熟知警隊運作嘅朋友仔,佢聽完得啖笑,話警隊一向有好多唔同祖籍嘅成員,有新移民成為警員唔係咩新鮮事,人哋母語係普通話,咁有時做嘢講兩句都冇咩嘢吖!事實又係咪真係咁呢?
到咗下晝,由於傳言真係太勁,警務處都要經新聞處出稿作出嚴正澄清,話對於有傳聞指有解放軍混入香港防暴警察,有關說法全屬謠言。不過,網民就好似就唔太收貨喇!至於個「謠言」當然繼續傳!
Jenny就覺得,呢件事好反映警民互信已經跌到冰點以下。小妹在此呼籲各位,要Fact Check!要Fact Check!要Fact Check!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票