韓國瑜的公主、王子、巨人與水果

　　韓流襲港！講緊嘅唔係韓星，而係高雄市長韓國瑜。佢今日第一次以市長身份到訪香港，出席高雄市經貿簡介會，今日中午仲去咗禮賓府同林鄭食lunch添！之後就去咗農產品介紹會，夜晚跟手去搭船仔遊維港，睇埋幻彩詠香江至返歸。

 政治VS水果

  韓國瑜喺高雄咁受歡迎，Jenny聽講係因為佢份人鄉土味夠晒濃，Jenny今日就見識到喇！連見記者時都三句不離農產品，連記者一連問佢「一國兩制」、「九二共識」、會唔會選總統三個咁直接嘅問題，佢齋講一句「問得非常好！」，就九唔搭八咁問返記者有冇食佢哋高雄嘅生果。雖然明眼人都睇得出佢迴避緊問題，但係以韓市長呢啲咁直接嘅轉話題方式，香港行家明顯唔會收貨囉！唔通佢對台灣記者一向都係咁樣答？

 公主、王子、巨人

  除咗鄉土味濃，韓國瑜仲好識創造金句㗎！不過佢啲比喻就真係......佢喺簡介會上致辭嗰陣，就將高雄比喻成白雪公主添！之前食咗個毒蘋果，有一日白馬王子錫咗下公主佢就醒咗，而高雄呢個巨人都瞓咗幾十年，而家醒咗喇！有內地傳媒之後就問返佢係唔係就係嗰個「白馬王子」，佢就話只係個比喻喎！係「白馬」定「黑馬」，遲下咪知囉！

旅遊業界包咗架船同韓國瑜齊齊遊維港欣賞幻彩詠香江，沿途勁多人圍住韓市長。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好