說話咪亂講！煲呔一出冊就話想飲杯「久違的咖啡」

　　之前有「煲呔曾」之稱嘅前特首曾蔭權，就因為公職人員行為失當罪被判入獄。雖然佢就已經向終審法院提出上訴，不過就冇保釋，所以計埋啲假，今日就係佢出冊嘅大日子喇！點知佢一出冊就又講錯嘢，認真大吉利是！

突然入院有景轟

　　作為香港首個涉刑事罪並罪成嘅最高級前官員，煲呔曾出冊就梗係引起大批傳媒捕實啦！Jenny知道今日攝記哥哥清晨就去到醫院門口等喇！點解係去醫院等呢？事關煲呔曾上星期五（11日）晚就突然話唔舒服，就被送咗入瑪麗醫院，到今日先出院，所以出冊「儀式」都係喺醫院進行。

　　不過有人就估，其實煲呔曾係唔想被人影到喺監獄出嚟，所以咪早幾日入轉醫院先，到時出嚟張相咪唔係監獄背景囉！小妹都覺得呢個說法其實不無道理啊！同為出冊，被人影到喺醫院行出來，點都好睇過喺監獄行出來喇！話晒張相日後只要講起呢單案，將會無限重用嘛！

嘢可以亂食 咖啡唔好亂飲

　　斷斷續續坐咗成年嘅煲呔曾終於出嚟，煲呔曾今日似乎心情大靚，佢一出嚟就首先多謝傳媒朋友廿幾年嚟對佢嘅關心，之後先話日後有咩打算、心情等等。至於出冊之後最想做咩呢？佢話，出獄之後最想嘅就係同太太傾偈，同埋想「飲一杯久違嘅咖啡」！OMG！曾生你先啱啱出嚟，咁快又想「飲一杯久違的咖啡」，仲衰過出獄望返轉頭！嗱～嘢可以亂食，說話就咪亂講！計Jenny話，最好都係（舌累）口水講過喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情