林鄭：做特首真係好辛苦！但又幾稱心滿意

　　特首林鄭話咁快就上任咗年半喇！呢年半佢做咗唔少史無前例嘅事，尤其係喺佢所指嘅「重中之重」嘅房屋問題上面，好似將資助房屋售價與市價脫勾、公私營房屋由六四比轉為七三比、推「港人首次置業上車盤」等等，貫徹佢「好打得」嘅形象，不過近日佢接受一個電視台專訪時，就大呻「做香港特首真係好辛苦」喎！

(香港開電視facebook圖片)

能持續獲得糟蹋亦滿足

　　林鄭就話，作為特首，每日由朝到晚都要面對好多嘢，包括一啲可預見同埋預見唔到嘅，所以話「做香港特首真係好辛苦」，但又覺得自己「做得幾輕鬆、幾稱心滿意」。咁矛盾嘅？唔通林鄭做起嘢嚟係「稱心滿意」，但係面對「網上欺凌」嗰時就「辛苦」二字出晒嚟，Jenny即刻就諗起一句歌詞：「能持續獲得（反對派）糟蹋亦滿足～～～」至於到底係辛苦定唔辛苦？真係學佢之前話齋「女人心，海底針」喇！

滿足感來自落手落腳促成一件事

　　話明房屋問題係「重中之重」，林鄭提到將資助房屋售價與市價脫勾，就話呢一個係一個相當徹底嘅改變，似乎都幾滿意呢個政績噃！至於講到任內遇到最難忘嘅事，佢就話係上年去探望肌肉萎縮症患者周佩珊嘅時候，終於可以親口同佢講罕見病藥物有得入口香港，嗰次係真正感受到做特首嘅嗰種滿足感，因為可以透過親自介入、游說，同埋政府樂意資助而促成一件事喎！

林鄭氏「湊仔經」－－准發白日夢

　　作為香港第一個女特首、香港NO.1嘅女人，林鄭同時又係一個「阿媽」，所以佢都不忘分享下育兒心得，叫咁多位港爸港媽唔好畀太大壓力子女，要畀佢哋「發下白日夢」，而家長應該以子女活得比自己更開心做目標先啱喎！林鄭氏「湊仔經」，大家真係要學下喇！計Jenny話，親生仔女畀佢哋發下白日夢，當然Very OK啦！但對住官員梗係要日日鞭策佢地啦！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】民主派初選案，45名罪成被告判囚4年2個月至10年不等，你認為判刑是否具阻嚇作用？► 立即投票