僭建可謂高官們嘅頭號政治炸彈，想當初現任律政司司長鄭若驊一上任就踩中咗，爆到佢完全唔敢出嚟見人，又由於律政司擔當檢控角色，無可能由鄭若驊自己查自己㗎，所以就放權畀刑事檢控專員梁卓然處理。轉眼間，事發差唔多一年，梁生終於度好喇，就係檢控司長個老公潘樂陶，而唔會檢控老細鄭若驊喇！

 

 

告老公唔告老婆 因為老婆不知者不罪？

 

　　諗起呢單新聞爆出嗰時，由於鄭若驊上任嗰陣冇申報丈夫係乜水，又冇喺殖民時期做過官，唔使話一定要冠夫姓，Jenny同大眾都係靠呢次風波先知司長老公係邊位！而且鄭司長係女強人，佢唔想冠夫姓亦一啲都唔出奇！

 

　　鄭若驊唔做丈夫背後嘅女人，咪由老公就佢背後嘅男人啦！事關兩人間屋都有僭建，點解淨係得潘生有事，鄭若驊冇事呢？等Jenny睇多次份刑事檢控專員聲明先。

 

　　梁生喺聲明入面話：「沒有證據顯示有關的僭建物是在鄭若驊購買4號屋後建造的，或是在她成為物業擁有人之後明知而展開或進行的違例建築工程」，咁即係話潘生係知道有僭建，但佢老婆唔知，所以司長就甩身喇！唔知點解呢一刻，Jenny彷彿見到潘生同唐郭妤淺嘅面容交疊咗咁嘅……？

 

律政司有權告律政司長

 

　　不過都係個句，檢控嗰個係律政司，之但係律政司可唔可以告返佢老細鄭司長呢？Jenny就住呢個問題問下律師黨（即係公民黨）黨魁楊岳橋（AY），AY就好肯定咁講：「當然得喇，佢放左個（檢控）權出嚟㗎嘛！」

 

　　AY仲話，今次律政司而為免產生任何偏頗印象，都有徵詢外間法律意見，其實係示範緊對於敏感人士涉犯罪時要點樣處理，就係應該諮詢獨立嘅法律意見，同埋公開理由會更有效說服到公眾。Jenny就覺得AY呢番話有啲弦外之音噃！觀乎涉及敏感人士又冇徵詢外間法律意見，近日似乎就得梁振英UGL單案……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情