2018-09-06
天災頻仍 日本,奸爸爹!
好多香港人都視日本為第二個「鄉下」,不過呢排佢就天災頻仍,令到好多人都好心痛。前日(4日)先啱啱被25年以嚟最強嘅颱風飛燕直撲,第二日仲有北海道地震添!Jenny都有唔少朋友仲滯留喺日本呀!
奸爸爹!
西邊暴雨 東邊熱浪 北方強震
今年嘅日本可以話係多災多難,年頭有雪災、6月中嗰陣其中一個港人旅遊熱點大阪發生6.1級地震,日本傳媒仲話呢次地震係大阪自1923年以來觀測到震度以來最大嘅地震!啱啱平復完,又整鋪千百年一遇嘅暴雨,造成50幾人死亡,160萬人流離失所。
西邊落完雨,東邊就要忍受熱浪,7月尾關東地區處處氣溫創新高,埼玉縣熊谷巿錄得嘅41.1度高溫仲破咗全日本紀錄添!今次大阪又再遭到飛燕蹂躪,連關西機場都浸埋,仲有北海道地震都造成9死300人傷,睇嚟日本政府要善後都有排搞……唔知會唔會影響之後嘅東京奧運呢?不過Jenny相信,至少係唔會影響到香港人「返鄉下」嘅信心嘅!
「多難興邦」
講起天災,Jenny就好記得四川汶川地震嗰時,時任總理溫家寶喺視察災情嗰陣,喺一間中學寫咗句「多難興邦」,Jenny覺得都可以用喺今次上面,希望天佑日本,奸爸爹!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
夏日中暑高風險!即睇中暑迷思+預防措施!► 立即了解