林鄭與你的七夕之約 大家準備好未？

　　大家記唔記得今日係咩日子呢？就係牛郎織女一年一度相會嘅日子－－七夕啦！佢哋兩個嘅故仔唔駛Jenny講，相信大家都會記得㗎喇，不過今日除咗佢哋兩個相會之外，大家又記唔記得特首林鄭都約咗大家今晚8點喺Facebook相見呢？見嚟做咩？咪就係齊齊傾今年嘅《施政報告》囉！

　　相信唔少人都有印象，之前嘅特首通常都係喺10月發表《施政報告》，到CY年代就推遲到1月先出。自上年林鄭上場之後，就將每年嘅《施政報告》調返喺10月發表，所以計一計條數，而家已經8月中，林鄭應該都差唔多要著手寫Report喇！

　　Jenny知道唔少政黨都已經趁暑假，就著《施政報告》向林鄭「獻計」，而公眾諮詢亦都正在進行中。不過林鄭似乎覺得仲未夠，所以星期一嗰陣就預告畀大家知，今日要喺Facebook開Live，親自聽大家對今年《施政報告》嘅意見！

　　嗱！截至今日下午5點，個預告Post已經有433個留言同百幾個分享，林鄭其他日常Post平時都係200個留言左右，即係話多咗成倍！睇嚟反應都唔錯咁噃！相信大家都好期待睇佢第一次就《施政報告》開Live，正所謂「識睇一定睇留言」，Jenny就希望林鄭到時唔好唔識開留言嚟睇喇！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇